Mpho ea likoloeana e tla fanoa moketeng oa bosechaba oa Moafrika

E ntse e le ho keteka Mokete oa bosechaba, mabenkele a City Express, a tla kenya letsoho ka ho fana ka likoloeana tse hlano qhooeng ena molemong oa hore li tle li fetele ho ba nang le tlhoko ea tsona.

Ea buileng lebitsong la Bookameli ba mabenkele ao, ’Mamojaje Mokuku, o re ho fihlile tlhokomelong ea bona hore Moafrika Fm, e ikitlaelitse ho kenya letsoho litabeng tsa sechaba se hlokang, ke ka hoo, bo fanang ka mpho eo.

O re se etsoang ke Moafrika Fm se seholo bophelong ba sechaba ka kakaretso, ’me Bookameli ba habo, bo ikutloa bo lokela ho tlatsetsa bosebeletsing ba qhooa ena ho ntšetsapele pono ea mothehi oa sona.

Boemong bona molula-setulo oa liphutheho tsa batšehetsi ba Moafrika Fm, nkhono ’Mamokete Sebatane, o re ka ha esale e le qhooa ena e buletseng batho ba nang le bokooa mamati, ka ho ba thusa ho ikamohela, o leboha ha karolo e ’ngoe ea sechaba e utloisisa bosebeletsi ba Moafrika mafapheng a fapakaneng.