Morena o re moipehi o sotla sechaba sa hae, Mohalesuku

Morena oa Likueneng Auplas, Ha-’Mantloheleng Lereko, Mohalesuku, o re ho na le monna ea sotlang sechaba sa hae ka ho tšoara liphoofolo tsa sona le ho abela batho litša sebakeng see a ipehileng ho sona, ha a tloha ha habo Tlaling.

Morena ’Mantloheleng Lereko, o re ho latela litšotlo tsena le tse ling, o bona ho le molemo hore ba mpe balehele sebakeng se seng molemong oa hore ba mpe ba phele, hobane monna eo ha a thibehe.

O re taba ea monna eo, e se e kile ea kenoa ke ’musi oa setereke sa Mohalesuku, hore a tlohe moo ha a na tokelo ea ho lula sebakeng seo, ’me e se e le lilemo tse tharo ba le ka tlas’a litšoso tseo.

Sena o se bua a ipapisitse le hore babusuoa ba babeli ba hae ba amohiloe linku le likhomo tsa bona ke monna eo, ba li alositse, a li isa sekete ka Moqebelo o fetileng.

Litaba tsena li tiisitsoe ke ’musi oa setereke seo, a ba a re sebaka seo se tsekoa ke metse e ’meli ea Likueneng le Phamong o bile a tlalehela letona la Puso ea Libaka le borena, tsa ba tsa theheloa komisi e li sebetsang.