Mokete oa bo-sechaba oa Moafrika Fm, o se o simollotse ka ho phetoa ha nalane ea motse oa Leseling, Ha-’Malebuajoang Maluke, Qachaseneke e ileng ea qoqoa ke monghali Khoejane Makhele lenaneong la Re ntša Lephola, ka Lapele la beke ena.

Rangoane Kaine ka moo a tsejoang ka teng, o re motse oo o reheletsoe ka noka ea Leseling, e reheletsoeng ka selomo se neng se e-na le lesoba le tsoellang ka nqa e ’ngoe, ’me tsena tsohle li entsoe ka khothaletso ea morena Theko Makhaola.

O re morena Makhaola o ne a etse seo ha a ne a tsoa ntoeng ea lefatše ka mor’a ho tla a ithutile mokhoa ea ho khobokanya metse le ho e rehella ka lithaba, marena le linoka.

Beke ena ke e maphatha-phathe haholo setsing sena sa khaso hobane litsebi tsa nalane li tla putukana, bahoebi ba tšehelitseng mokete ona, ba tla tsoelapele ho hlalosa mesebetsi e fumanehang likhoebong tsa bona mananeong a fapakaneng.

Ka Labohlano teng, mokete o tla tsoela kantle sechabeng, moo batho ka ho fapakana ha bona, ba tlang ho keteka ka ho etsa menyakoe e fapakaneng, ka Moqebelo, e tla ba lipapali le mokhoro oa Litotla ka Sontaha o phetheloe ka ’mino.