Mosali o beheloa nako ea ho phutha mehasoana ea hae

Mosali oa Lithabaneng Ha-Keiso, Maseru, o re o tsietsing ea bolulo ka mor’a ho bolelloa hore a be a tsoile motseng oo, nakong ea matsatsi a supileng, ka le reng o mahlapa, e bile morali oa hae o chaufana le monna oa mosali oa motse oo.

’Maitumeleng Lekatsa o re liqoso tsena ha li na motheo hobane esale a a lula motseng oo ho tloha ka mongoaha oa 1994, a tsoa Rothe, Tšoeneng Ha-Letsie, Maseru.

Morena Mothobi Moholi, o re litaba tsa mosali le morali oa hae, li bile tsa fetela moreneng e mong, moo ba ileng ba hloloa ke nyeoe.