Lelapa le re le tsebile sesosa sa lefu la ngoana lona, eseng se boleloang ke melaeli

Moshanyana oa Qoaling Ha Besele Maseru, o fumanoe a leketlile sefateng ka Laboraro lena hoseng, ka mor’a puisano ea bona le monna ea neng a ’melaella ka ho pshatla ntlo le ho mo utsoetsa thepa le chelete.

Monghali Peiso Kelane o re sena se latela hore a etsoa mosebetsi a fumane a utsoelitsoe chelete e ka holimo ho likete tse ’ne tsa Maloti le junifomo ea sesole e khoarahlana ka Labobeli lena motšeare oa mantsiboea.

O re o ile a lemoha mehato ea lieta tsa ’melaelloa, a ea tlalehela sepolesa sa Lithoteng, tseleng e khutlang a kopana le eo tseleng, a ’molella hore o belaela ka eena, empa eena a hloka karabo ha e se ho inama.

Kebane o re hoseng ha Laboraro la beke ena, ha a ntse a emetse mapolesa ho tla hlahloba tšenyo, ke moo a ileng a utloela ka setopo se fumanoeng se leketlile, se ileng sa phuthoa ke  mapolesa a Lithoteng, se tsebiloeng e le sa moshanyana eo.

Ho sa le joalo rangoan’a mofu, monghali Thatho Thatho, o re lelapa le fumane sesosa sa lefu la ngoan’a lona, mohaleng oa hae, moo a bileng le puisano ea tsapotsapo pejana, ho fapana le se boleloang ke monghali Kelane.