Mosali o re khaitseli e khakhathiloe ke baamani le eena ba e tsekisa likobo

Mosali oa Nazaretha Ha Seetsa Theko, Maseru o re khaitseli ea hae e Matelile Ha-Seeiso, e khakhathuoe ke baena ba hae ba leloko ka Lapele la beke, ba tsekisa ’mala oa likobo.

’Manthabiseng Thaiseng o re tlaleho eo a e fumaneng ke hore khaitseli ea hae e ile ea khakhathoa ho fihlela e namoleloa ke ba neng ba feta ka tsela, ba tsamaea le eena, ba mo isa sepoleseng sa Matelile, a fuoa foromo ea ngakeng.

O re ha a tlosoa teng, ba mo isa habo, moo a fihlileng a tsoa mali ka litsebeng le linkong, a potlakisetsoa ngakeng. ’Manthabiseng o re o hloella qhooa ena e le ho kopa likeletso kaha a tseba hore ntoa eo ha e se e qalile joalo, le bona ba tla qaphaletsoa ke mali.