Marang-rang a sitisa phumantšo ea litšebeletso lefapheng la Lipasa, Maseru

Moahi oa Mankoaneng Ha-Teko, Maseru, o re o khutlile le se neng se mo isitse lefapheng la lipasa ka Lapele lena, hobane o boleletsoe hore marang-rang ha a sebetse, mohlomong a tla be a khutletse tšebetsong ka Laboraro la beke ena.

’Mafani Mokhele, o re o tsohile ka matjeke ho ea fetola lipasa, a fumana sechaba se sengata se neng se ile litšebeletsong, ’me bohle ba lokela ho khutlela malapeng ba kobile lihlooho.

Litaba tsena li tiisitsoe ke phala ea lefapha, Ms. Hape Marumo, hore ho bile le bothata ba ho oa ha marang-rang ka Labohlano le fetileng, le ha ho le joalo, tšepo ke hore ka Laboraro lena litaba li tla be li lokile, hoba mechini e ne e se e sa sebetse hantle, e liehisa litšebeletso.