Batsoali ba ts’oentsoe ke ho koaloa ha likolo ka lebaka la boitseko ba matichere

Batsoali ba tšoenyehileng, ke ho koaloa ha likolo ka lebaka la boitseko ba matichere a mekhatlo e meraro ea marobachoko, ba tla nehelana ka lengolo la litletlebo ka Labobeli lena lekaleng la Thuto, Mafeteng.

Molula-setulo oa komitjana ea batsoali, monghali Foreisara Lehlokoe, o re lengolo leo, le bua ka ho tingoa tokelo ea ho ithuta ha bana, ’me ba lebeletse karabo ea bona nakong ea matsatsi a supileng.

O re lengolo le tla ea ka mokoloko oa khotso liofising tsa lekala la Thuto, ’me ha ba lebella lipolelo tsa likobiso kapa mahlapa nakong eo, etsoe ba tsamaisitse litaba tsa bona hantle ka molao.