Batsamaisi ba mananeo a Lipapali ba Moafrika, ba ipabola likhaung tsa Alliance

moafrikafm--1554094152224.jpgBatsamaisi ba mananeo a Lipapali setsing sena sa khaso ba haharile likhau tse neng li hlophisitsoe ke Alliance Inshorense, ho e ’ngoe ea lihotele tsa Maseru, shoalaneng ea maobane.

Tumelo Ramaputle(The Big R) mokhahlelong oa bahasi ba papali ea bolo ea maoto, o ile a itlhoma pele, ha Liteboho Hlakane (Benny the Boy) a hlahile boemong ba boraro, athe Chalale Mokhethi ke motlalehi oa selemo oa Lipapali mokhahlelong oo a neng a le ho oona.

Batsamaisi bana ba mananeo a Lipapali, ba ile ba kenela litlholisano tsa Alliance Sport Media Awards, ka ho vouteloa ke barati le bamameli ba bona. Boraro boo ba bona bo re bo bile le nako e monate,’me ba leboha tšehetso ea batšehetsi.

Lifariki li fumanoa li nyahlalitsoe Maputsoe

MAIN-Pigs-infected-post-weaning-are-particularly-susceptible-to-respiratory-diseases-c-no-credit.jpgMoahi oa Maputsoe Ha-Maqele, Leribe, o re o fumane lifariki tsa hae tse peli tse neng li ile tsa hlokomeleha hore ha li eo, hoseng ha Labohlano lena nakong ee setloholo sa hae se neng se il’o li fepa.

’Malebololo Mothoalo o re o etselitsoe molaetsa ke bana ba re bona ba boleletsoe ke moahi e mong oa motse hore li teng ka har’a oona, ’me pelaelo ea hae ke hore li nyahlalitsoe ke mashotsoana a motse oo, a fetotseng ha hae lehae la oona.

Ngoanana ea nang le bokooa o lebeletse lesea kamor’a ho betoa ke moahisane

Moholoane oa ngoanana oa ’Melikane Ha Makhaola Lekhetho, Qachaseneke, ea lilemo li mashome a mabeli a metso e mene ea nang le bokooa ba kelello, o re ngoanana o lebeletse lesea leo a imisitsoeng ke sebiti seo ha joale se leng ka tlhabollong seterekeng seo.

Ea buileng le Lehakoe la Litaba o re se mo hloellisang qhooeng ena ke hore lelapa la habo ngoanana le kile la bitsetsoa khotla bekeng e fetileng ka Labobeli, ka le reng malapa a buisane ’melaelloa a tsebe ho tsoa toronkong, a tl’o hlokomela lesea leo ’m’a lona a le lebeletseng khoeling ena, empa ba latola.

O re monna eo oa moahisane o ile a hla a qhalla lelapa matsoho ka pela morena ea neng a ba kopantse le hoja a sa hane hore o bitile ngoanana a ne a ile patsing a le mong. Lebaka le leng ke hore o ile a leka ho balehela RSA ha a tla qhautsoa ke sepolesa.

Lelapa le boloka bafu ba babeli

Lelapa la Mohlakoana le Maphakatlaling Ha Ramashamole, Maseru, le bolokile bafu ba lona ba babeli, bao e mong oa bona ea lilemo li 56, a ileng a hlokahala ka mor’a hore a phethohe ka koloi ea ’moshara ha ho tsoa latoa mofu ntate oa hae oa tse 105, maobane.

E mong oa ba lelapa lena,’Manthabiseng Maime, o re tlaleho eo a e fumaneng, e re koloi e ile ea phetoha Ha Mohlachane, ea hlahisa moqhobi oa eona likotsi, ha e le mor’a mofu a hla a hlokahalla sebakeng sa ketsahalo.

O re ’moshara o ile oa lokela ho romela lekase le leng ka ha le neng le tsetse mofu, le ne le ile la utloa bohloko ke ho oa,’me sepolesa se ile sa fihla sa phutha mofu oa bobeli a isoa ’moshareng, moo a latiloeng kajeno ho bolokelloa le ntat’ae.

Lipitso tsa Tlhophobocha li tima Basotho ba bangata ho hlahisa maikutlo

Bamameli ba Pusong ea Sechaba ka Sechaba, ba re lipitso tse malebana le Tlhophobocha tse ntseng li etsoa ke mekhatlo e ikemetseng, naha ka bophara, ha li fihlele sechaba se sengata hoba li ba nakong ee boholo bo leng mesebetsing.

Ba re taba eo, e koalla maikutlo a Basotho ba bangata kantle, ’me mekhatlo ha e lokela ho fana ka tlaleho ea tšebetso ea oona, e tla fana ka bohashana hoba boholo ba maikutlo e sa bo fumana.

Ba bile ba re kutloisiso ea bona ke hore ho ke ho sebelisoe se-ea-le-moea ho pharalatsa litaba tsa mekhatlo ena hoba ka sona e ka fihlela sechaba se sengata ka nako e le ’ngoe sa ba sa botsa lipotso le ho tlatsetsa mananeong nakong eo.

Le ha ho le joalo, ba re ho tloha sethathong sa litaba tsa Tlhophobocha, ho utloahala ha bohle ba nang le kobo ea bohali ho tsona, ba sa ee ka maikutlo ho fihlela se hlokoang sa ho hlopha bocha, molao oa motheo oa Lesotho, paramente, le tšireletso har’a tse ling.

Bamameli ba re taba ea boitseko ba matichere e se e sa utloahale

Bamameli ba Lephola la Labone la beke ena, ba re litaba tsa boitseko ba matichere li se li sa utloahale hantle, ho latela litlaleho tse ipetsang tse reng a tla ke a khefutse boitsekong ba oona.

Tsena, ba li buile ba ipapisitse le se builoeng ke e ’ngoe ea liphala tsa mekhatlo e meraro ea matichere, monghali Letsatsi Ntsibolane ea itseng ho tla boeloa lihlopheng ka Lapele la beke e tlang, feela a sa re qii hantle ka se fihletsoeng.

Linokoane li phatla lifensetere tsa malapa a mabeli, Maputsoe

Baahi ba babeli ba Maputsoe Ha-Maqele, Leribe, ba ile ba fumana matlo a bona a pshatletsoe lifensetere ke batho ba sa tsejoeng mesong ea Laboraro la beke ena, ’me ha ho motho ea tsoileng likotsi.

Mofuputsi oa litaba tsena, monghali Sepeka Makoae, o re tlaleho ee a e fumaneng e re lapeng la pele, linokoane li ile tsa pshatla fensetere, tsa mpa tsa sitoa ho kena ka tlung ka lebaka la litšepe tse kentsoeng teng.

Ho feta moo, lapeng la bobeli, linokoane li atlehile ho kena ka karajeng ka  fensetere, tsa ntša koloi, tsa roba heke, empa ea ema khekhenene ka har’a motse moo li ileng tsa e nyahlatsa teng.

Liofisi le likhoebo li koaloa ke tlhokahalo ea metsi, Maseru toropong

Liofisi tsa ngoliso ea makoloi li hulanya maoto hoo e tla re beke e tlang e thoasa, ho be ho se na koloi e nang le tokelo ea ho sebelisa mebila ea sechaba Lesotho mona.

Ho tloha ka Lapele la beke ena, Basotho ba khutlile ba sa sebeletsoa liofising tsena tse bulang morao ho nako, feela li koala ka pele, le ba robalelitseng kantle ho li ofisi ba re ba ntse ba sa sebeletsoa, ba kene letsatsing la boraro joale.

Ha ho hlile ha ho tsebahale lebaka la bosebeletsi bona bo makatsang, empa, ba haufi le litaba ba re bahlanka ba utloisitsoe bohloko ke ho se nyolleloe meputso empa bahlomphehi ba ekelelitsoe ka nyetle-nyetlehali.

Ho sale joalo, boholo ba liofisi bo setse ka basebeletsi ba fokolang ha tse ling li koetsoe ka lebaka la tlhokahalo ea metsi bohareng ba toropo ea Maseru, ’me ha ho motho ea ithaopelang ho hlalosetsa sechaba hore na molato ke eng.

Matona a ikarabelang, mongoli ’muso le phala ea oonao ha ba fumanehe ho thusa sechaba ka tlhaloso e nepahetseng.

Basotho ba supileng ba bolailoe ke MaZulu, ho tsekoa mesebetsi

Basotho ba supileng ba se ba fenethiloe ke MaZulu a Natala ha ba bang ba bangata ba tlalehoa ba nketsoe litsing tsa kokelo, ka likotsi tse mpe. Ba hlasetsoe ke MaZulu a reng Basotho ba ba nkela mesebetsi.

Makoloi a limomoro tsee e seng tsa Afrika Boroa le tsona li hlalosoa li hlaseloa le ho chesoa ke bacha ba halefileng haholo ba profofinsi ena ee Basotho ba bangata ba reng thepa e rekisoang ke baits’okoli, le bana ba likolo ba isoa ho eona ho ea bona leoatle.

Litaba tsena ha li e-so tiisoe ke ’muso oa Lesotho, empa li se li tletse lefatše ka thomello ea marang-rang a facebook. Teko ea Lehakoe la Litaba ea ho fumana phala ea ’muso ha ea atleha.

Likhakanyo le kabo ea lichelete tsa ’muso ke taba e makatsang

Lenaneo la Puo ea Sesotho ka Labone lena, le lumellane hore tsela ea joale le ea linako tse fetileng, ea ho phatlalatsa likhakanyo tsa lichelete le kabo ea tsona ha e lumellane le se ka likelellong tsa sechaba se lokelang ho sebeletsoa ka lichelete tseo.

Maikutlo e bile hore, bothata bo tsoaloa ke likhakanyo tse bonahalang li etsetsoa sechaba, tse sa kolleng sechabeng, tse bonahalang li iketsetsoa ke letona le liofisiri tse ikarabelang.

Benghali Serialong Qoo, Letsatsi Sephepha le Ramokhali Shale ba bile ntsoe-leng hore tšebetso eo, hore e tle e nepahale, e lokela ho qala makhotleng a pusong ea libaka, e be e hlakise hore na sebaka ka seng se tla sebeletsoa joang ka bokae.

Ha feela ho ntse ho sebetsoa likhakanyo le kabo ea lichelete ka tsela ena, ba itse ha ho mohla litlhoko tsa sechaba, e leng litšepiso tsa likhetho li ka fihleloang, e tla ba taba e kang ea mosali ea tšepisoang terene le sefofane ka nako e leng ’ngoe ka lebaka la lengole la hae le lutlisang liqhenqhe tsa ’mamphokoro ea khahloang ke lona.