Bohanyetsi bo rahile serankana sa NDPC ka rifi e nko ea tšepe

Serankana sa Komiti ea Meralo ea tlhophobocha se ile sa rahoa ka rifi e nko ea tšepe, sebokeng sa mekha e ka har’a paramente le ka ntle ho eona, sa thibela morero o hlalositsoeng e le oa mafifi, oa boqitolo le bomenemene, oa ho fa Mekhatlo e Ikemetseng mosebetsi oa ho fupuletsa tlhophobocha maikutlo sechabeng.

Benghali Serialong Qoo, Teboho Sekata, Letsatsi Sephepha le David Seutloali, liphala tsa mekha ea Khokanyanaphiri, ba re ba bile ba thibela khiro ea monna ea neng a koahetsoe ka kobo e thokoa, ea tsoang kantle ho Lesotho a bitsoa setsebi se tlilo thusa Tlhophobocha ka phuputso ea maikutlo a sechaba.

Taba ea ho honyetsoa ha MOAFRIKA ee ho thoeng e ne e se e kenyellelitsoe moralong oa liphuputso ka har’a sechaba, le eona e hlalosoa e ile ea tjebeloa matjoing ke Khokanyanaphiri, beng ba eona ba sala ba soabile sa motho ea bonetsoeng.

 

Liphala tsa Khokanyanaphiri li re Komiti ea Meralo ea Tlhophophobocha e ile ea laeloa hore e khutlele morao ho ea itlhopha, e ntse e bile e tseba hore ke bahiruoa ba boetellipele ba liphathi, e tlohele ho iketsa mohlape-moipusi, kapa poho ea khothu, mathula-hohle. Komiti eo, e okametsoe ke Benghali Chaka Ntsane le Mikia Molapo