Ho honyetsoa ha Moafrika ho imetsa likhoebo le sechaba ka bophelo

E mong oa batšehetsi ba mokete oa bosechaba oa Moafrika, o re ho honyetsoa ha se-ea-le-moea sena, ho sisintse metheo ea khoebo ea bona hobane ha ho sa utloahala liqi tsa bona.

Monghali Moramang Thantši ea tsejoang ka Moetlo oa Basotho, o re o mpa a tšehelitse mokete ona hobane a oa le ho tsoha le se-ea-le-moea sena sa Sechaba ka Sechaba, ka ha se ile sa mo nyolla, sa mo beha moo a seng a le hona teng.

O re bohloko bo fetang, ke ba batho ba filoeng mosebetsi likhoebong tseo ba seng ba ntse ba felloa ke eona hobane, lipokotho tsa bahoebi li se li phunyehile masoba, li lahlehetsoe ke bareki.