Ho honyetsoa ha Moafrika ho baka moferefere sechabeng

Monghali Tankiso Oa-ribaneng Domela o re ho honyetsoa ha Moafrika FM libakeng tse ngata tsa naha ena, ho tlilo qabanya sechaba se e mamelang le se e mamelloang ke ba bang, ka le reng ba bua mashano ka sona, ho ba bang.

Letsoalloa la Ribaneng Moru-Motšo Ha-Rantolo, Mafeteng, le re sechaba sa habo lona se batlile se le ja ka meno se re se utloetse hore le itse hoja bese e ileng ea oa Ha-Ralehlokoa e neng e palamisitse Mapotoana a neng a ea sebokeng Ha-Foso, khoeling e fetileng, e ne e a bolaile, le ka be le thabile.

Oa Ribaneng o re mohonyetsi a ke a ele hloko pherekano ee a e bakelang sechaba ka ho honyetsa se-ea-le-moea sena se ratoang ke sona, hoo boraleshano ba seng ba nkile monyetla oa khonyetso eo, ho foqa sechaba mashano a ka ’nang a khannela ts’ollong ea mali a se nang molato.