Monna o re sepolesa sa Maputsoe ha se nkele litlaleho tsa litlolo tsa molao hloohong

Monna oa Maputsoe Matšoaneng Ha-Maqele, Leribe o re ho fihla moo ba khathetseng ke ho isa litlaleho tsa litlolo tsa molao sepoleseng sa tikoloho eo hobane ha se li nkele hloohong.

Monna eo Lehakoe la Litaba le phurileng leshoetla le eena, o re o bua tsena hobane ka khitla ea Labosupa le fetileng, ho ile ha utloahala molumo oa lithunya motseng oo, a letsetsa lepolesa le leng ka boemo boo, la se ke la mo tsoela molemo.

O re hoseng ha a tsoela kantle, a fumana fensetere ea hae e na le lesoba la kulo, hang a letsetsa mookameli oa sepolesa sa Maputsoe, ea itseng a ise tlaleho eo sepoleseng, ’me le ha a se a phethile joalo, ha ho khato e nkiloeng ke sona.