Morena o batla tharollo tsietsing e sotlang sechaba sa hae, Berea

Ramotse oa Khubetsoana Ntširele, Ha-Hlathe Majara, Berea, o re sechaba sa hae se phela matsoalong ke litlhaselo tsa monna oa motse oa hae, tseo a atisang ho ba etsetsa tsona, ’me boemo bona bo ntse bo e-hloa mekoalaba.

Morena Teboho Mohoanyane o re sechaba se neng se luletse bothata boo fatše ka Labosupa la mafelo a beke e fetileng, se khothalelitse hore monna eo a isoe Sepetleleng sa mafu a hlooho, Mohlomi, empa, molekane oa hae a re khale ba mo isa moo, a ntse a khutla ho thoe ha a kule.

E mong, monghali Tšeliso Makara, o ne a ile a tlalehela Lehakoe la Litaba hore monna eo, o ile a betsa nkho ea hae ka lejoe, ea pshatleha, ha morao a fethetsa bana ba ka bang lilemo li tharo ka majoe, a mpa a ba fosa, bona ba baleha. Tseo, ke tsa Labotšelela le fetileng.