Monna oa Keiting Ha-Makoanyane Pitso, Qachaseneke, o litlamong tsa sepolesa sa moo ka pelaelo ea bosholu ba lifono le teko ea peto eo ea banana ba lilemo li lipakeng tsa leshome le leshome le metso e mehlano, ba sekolo ba lulang malaeneng.

Letsoho la morena, monghali Moshe Mofuthoane, o re senokoane se keneng le monyako, ka lebaka la lemati le sa koaleheng, se ile sa tšosa bao ka thipa sa nt’o ba utsoetsa lifono. O re banana ba bang ba ile ba tsosa e mong oa bahiri, ea ileng a betana le sona le ho se hlahlatha ka lejoe.

Leha ho le joalo se ile sa chophola sa ipha limenyane, empa mahokela a fumana mohlala ka mohala oa lona o neng o setse ka baking ea lona, e ileng ea sala nakong eo le neng le ipha limenyane.