Moetellipele oa Potoana o re tlas’a boetellipele ba hae, lekhotla leno le tla pharallela likoting le likotjaneng tsohle tsa Lesotho le Afrika Boroa, ’me haufinyane o tla be a phatlalatsa profinsi ea Kapa Bophirima, e be ho se ho latela tse ling. O itse lebitso la letšolo lena ke Operation Holisa DC.

A bua a le Korokoro, Ha Rantšete sebokeng sa hae sa pele a lutse sa maroatsana, mokheng o moholo oa bohanyetsi, Monghali Mathibeli Mokhothu, o itse o se a qalelletse ho tebisa mecha ea puisano le karolelano ea melaetsa ka har’a Potoana.

Ka ako e khutšoanyane a le ka ofising eo e kholohali, o itse o se a thehile mabota a marangrang a Twitter, Facebook le Online. O itse balateli ba mokha oo, ba tsebe hore litaba tsa bona li tla fumaneha mono feela, ba khaohale le mabota a mekha e meng le a beng ba ’ona, a tla ba lahlisa tsela.

Katleho ea seboka seo, e bile kamohelo ea batho ba kaholimo ho sekete, bao boholo ba bona bo neng bo tsoa ka ho AD, bo nokiloe ka motsoako oa Manasi, MaKobotata le ba neng ba qala ho kena polotiking, boholo e le batho ba bacha lilemong.

Ka Laboraro la beke ena, Davida oa Mapotoana, Smartman sa ’Maamohelang oa Likhoele, o tla kopana le litho tsa likomiti tsa Setereke sa Maseru, tsa lekhotla leo, lipuisanong tse koaletsoeng.