Lilori tse leshome le metso e mehlano li tšoeroe ke sepolesa sa Afrika Boroa ka pelaello ea ho tšelisa boea ka bomenemene ka khitla ea Labotšelela, ’me tse neng li le ka borokhong ba Maseru, li ne li le leshome, li ne li e-na le baqhobi ba tsona.

Mofuputsi oa litaba tsena, Tabane Ramainoane, o re tlaleho ea liofisiri tsa sepolesa sa Afrika Boroa, e re se lokelang ho etsahala ke hore lilori li tla lula li le polokelong ea sepolesa ha ho ntse ho etsoa lipatlisiso. Lilori li tšoaroa tjena bo-ranku-likae ba bang ba e-so lefshoe, ha karolo e ’ngoe e fumane bohashana feela ba chelete.