Bana ba sekolo ba abeloa lieta le likausi, Maseru

Mookameli oa sekolo sa mathomo sa St. John Tlali, se Makhalaneng Ha-Tlali, Maseru, o re o lebohela bana ba sona ba mashome a mabeli a motso o mong ba filoeng lieta le likausi ke e mong oa bana ba sona ba mehleng, ka Labohlano la beke ena.

Sister Bernadeta Seoaholimo o re limpho tseo, li arabetse tlhoko ea bana ba hlokang hobane ba tla tseba ho ithuta ba lokolohile. Sena se latela hore monghali Lebohang Litšooane ea tsebahalang ka la Moruti mabaleng a baitšokuli, a itlame mala-masesane, a ba rekele limpho tseo.

Le ha ho le joalo, o re ba bang ba sitiloe ho itatela tsona ka baka la maemo a leholimo, empa ba tla li fumana ha ba le teng, ’me lena ke lekhetlo la boraro a kenya letsoho thutong ea bana ba sechaba, a ba a tlatsetsoa ke moitšokoli e mong oa habo.