Baitšokoli ba tlosoa pel’a moaho oa khoebo ea molata, Mafeteng

Baitšokoli ba babeli ba Mafeteng ba re ba ’musi oa setereke seo, o ba qobella ho tloha pel’a moaho oa khoebo ea molata, ka le reng, mong’a oona ha a ba hloke sebakeng seo, ka hona, ba be ba tlohile moo ka Labosupa lena, ’me b’a hana.

Ea buileng lebitsong la bona o re, ’musi oa setereke o ile a ba bitsa hore ba amohele makholo a mahlano a Maloti, bakeng sa batho ba ka ba thusang ho tlosa mek’huk’hu eo, ho ea e hloma sebakeng se tšoaetsoeng boitšokoli.

’Musi oa setereke, Monghali Ntsane Mathibeli, o re baitšokoli bao ba lokela ho tloha sebakeng seo, hobane ba koetse moo ho laolleloang thepa ea lebenkele, ’me mohoebi o ba thusitse ka makholo a mahlano a Maloti, ho tlosa mek’huk’hu eo.