Probono e re LCN ke eona e lokelang ho jarisoa lekoko la likhetho tsa ABC

Probono ea Labobeli la beke ena e re, LCN e fela e lokela ho jarisoa lekoko la nku ea likhetho tse belaetsang Makobotata a mang, ka mor’a likhetho tsa Komiti e Kholo ea Kobotata, tse bileng libekeng tse peli tse fetileng.

Ba nka mohlala likhethong tsa naha, bamameli ba itse, ba filoeng boikarabello ba ho khethisa, ke bona ba lokelang ho etsa sohle se molaong ho atlehisa likhetho, ho kenyelletsa tlhophisi ea manane a bakhethi, polokeho ea bakhethi le likhetho tse bonaletsang, har’a tse ngata.

Ba itse, LCN ka boemo ba eona, e le mokhatlo o rupelang Basotho nakong ea  likhetho tse kholo le tsa puso ea libaka, moo e beng e li lebelle le ho fana ka maikutlo malebana le hore na li sebelitsoe hantle kapa hampe, e ne e lebelletsoe hore e etse likhetho tse tsoileng matsoho, ho tseo tsa Kobotata.

Motsamaisi oa lenaneo o itse Lehakoe la Litaba, le emetse ho bona lipamiri tsa nyeoe, tsa ba qosoang ke Habofanoe Lehana, Keketso Sello le Mohapi Mohapinyane ka ha e le ka tsona Basotho ba tlang ho tseba hore na, ho etsahetse eng, ha ho tla hlaha sephetho se khannetseng ba bang makhotleng a boahloli. Ka ho ts’oana, tebello e kholo, e qetong ea lekhotla le tlang ho mamela nyeoe eo. RK