Tliliniki e koetsoe ka lebaka la bosieo ba baoki

Tliliniki ea ’muso Senqunyane Ha Phafoli, Mohalesuku, e hlalosoa e koetsoe ka lebaka la bosieo ba baoki, ka Lapele lena, sechaba sa khutla se sa sebeletsoa.

Monghali Thibeli Monoto o re seo a se fumaneng, ke hore baoki ba re ’muso ha o e-so lefe mong’a malaene ao ba lulang ho oona, joale ha ho tsebahale, moo ba ileng teng.

Litaba tsena li tiisitsoe ke mok’hanselara, monghali Thakholi Motsamai, a ba a re baoki ba bararo ba tsamaile bekeng e fetileng, ka baka la ho hloka bolulo, hobane ’muso o kolota mong’a malaene likhoeli tse robeli.