Mohiri o pholoha ka mohlolo

Mohiri matlong a Koalabata, Berea, o re o pholohile ka mohlolo nakong eo a neng a nkoa ke phorohloana, haufi le thaba motseng oo, ka Labosupa le fetileng, moo bibele ea hae e sa kang ea koloba, ha mpa ha koloba mohala oa letsoho.

Lieketseng Hloma o re o ne a tsoa kerekeng, a jere mokotla o tšetseng mohala oa letsoho le bibele, a tšela ka sebete hobane a ne a bona metsi a fokola, athe phorohloana e tibile, le hoja majoe a ne a ntse a hlahelletse kantle ho metsi.

O re o ikutloile a se a le kantle ho phorohloana eo, ka tsela eo a sa e tsebeng ’me o leboha Molimo ka ho mo pholosa hoja a ne a le makhatheng a ho nkoa ke eona.