Moshanyana o khakhathoa ka pelaello ea bosholu ba malapeng, Maseru

Moshanyana oa Maputsoe Ha-’Mathata, Leribe, ea lulang malaeneng Ha-Thetsane Maseru le nkhono oa hae, o ile a khakhathoa hampe ke sechaba sa teng, ka pelaello ea hore o utsoitse chelete malapeng a fapakaneng a sona, ka Labobeli lena.

Ea buileng lebitsong la baahi, e bile e le lehlatsipa, ’Mathato Nkoetla, o re moshanyana, o ile a mo utsoetsa makholo a supileng a Maloti, a sa re o maketse, a fumana hore o se a kene lapeng le leng, a utsoa e ka holimo ho sekete sa Maloti

O re moshanyana ha a tla tšoaroa, o ile a bonoa a ntse a thathika ka ntlo, ’me motho ea ’moneng, a mo nanyetsa, a mo qhautsa, ha hlajoa mokhosi, sechaba sa phalla sa mo shapa, se ntse se bile se tlalehela sepolesa sa Ha-Thetsane, ka eena.