Thabane o re seboka se seholo sa Kobotata ha se e-s’o koaloe ka molao

Moetellipele oa Kobotata o re ho na le litletlebo tse ntseng li sebetsoa ke ba lokelang, tse malebana le sephetho sa likhetho tse sa tsoa feta tsa komiti e kholo ea ABC-Kobotata, ka lebaka leo borumuoa bo khobe matsoafo, bo emele sephetho sa molao sa likhetho tseo.

Lengolo la Bolisa la moetellipepe oa Kobotata le re ka lebaka la mosebetsi bongata, seboka se ile sa tlolela letatsing la boraro, ’me sa qetella se qhaliloe ke mapolesa ka ha se ne se se fetile matsatsi a hlahang polomiting ea ho ts’oaroa ha sona, ka lebaka leo, seboka ha se e-s’o fele, se tla boela se khobokana, ha ho se ho phethetsoe mosebetsi oa khetho, moetellipele a nt’o koala seboka seo ka molao.

Hona lengolong leo moetellipele oa Kobotata o hanyetsa ka matla mafosisa a buang ka ho thehoa ha lekhotla le lecha la lipolotiki ke ba nkoang ba hlotsoe ke likhetho tsa komiti e kholo ea mokha oo. O re ke litaba tse mpang li reretsoe ho ferekanya Makobotata le sechaba sa Basotho feela.