Nyeoe ea Lehlohonolo Scott e tsoelapele Lekhotleng le Phahameng la Lesotho

Lekhotla le Phahameng la Lesotho, ka Laboraro la beke ena, le mametse bopaki ba ho thoba ha Lehlohonolo Scott, chankaneng e kholo ea naha ena ka selemo sa 2012.

Bopaki ba ofisiri ea lichankana, Hlalele ’Mabathoana, bo re o ne a fumane ho se letho leo ho kena-kenanoeng le lona la setokisi seo Scott a neng a koaletsoe ka ho sona, ho kenyeletsa lemati, lifensetere le marulelo.

’Mabathoana o re, taba ea hore ho fihlile banna ba bararo, ba liaparo tse lefifi, ba roetse likatiba tsa thola-moea, ba kanyapa Scott ka mor’a ho mo etela le ho mo thobisa chankaneng, o hloloa ho e hana kapa ho e lumela, ka ha a ne a se mosebetsing ka letsatsi leo, la la leshome le metso e meraro, Mphalane 2012.

Lesaoana Mothepu, e ’ngoe ea liofisiri tse faneng ka bopaki ba Mofapahlooho, e tiisitse litaba tsa ’Mabathoana, ea mpa ea phaella ka hore, eona e belaela hore ho thoba ha Scott e bile mosebetsi o kapanetsoeng ke liofisiri tsa chankana le tsa sesole tse neng li le mosebetsing ha monna eo a tla tsoha a le sieo. Nyeoe e ntse e tsoelapele ka pel’a moahloli Teboho Moiloa.