Mosali o batla ho arohana le mocheliete o mo phelisang ka thupa le ka mahlapa

Mosali oa Naleli Ha-Moeketsi Mothobi, Maseru, o re ho fihla moo a khathetseng ke bophelo boo a bo phelisoang ke mocheliete oa hae, o mo hlapaolang le ho tokhotsa bana ba hae. O re ha a sa ’matla.

Mosali eo Lehakoe la Litaba le nang le mabitso a hae, o re monna o lula a mo bolella hore ha a na ho fepa bana bao ba bangata. O re nakong ea ho bonya ha bona, o ne a bolelle monna eo hore o na le bana ba bararo, eo a re “se rata ngoana ke se rata ’masona” o makala ha a se a mo buela lipuo tsena tse makatsang le ho sotla bana ba hae.

O re o se a batla ho arohana le monna eo ea seng a bile a ekelitse lelapa la hae ka ngoana ea lilemo li peli. O re molafu ona o hloloa ho hlokomela le eona tsoala eo ea oona.

Monna eo ho lluoang ka eena, o re o labalabela hore ba boele ba phele ’moho ka khotso, le hoja molli a batla hore a ee toronkong ka tsa phelisano ea bona, le ha ho le joalo, bobeli bo hloka likeletso tse tla ba thusa ho tsoelapele.