Koloi ea ma-DC e oele ka Sontaha

Mokhethoa oa ’Maliepetsane o re moifo oa bakhethoa ba Potoana, ba Mafeteng, ba etetse Ribaneng ka Laboraro lena, ka sepheo sa ho ea khothatsa litho tsa mokha oo, tse ileng tsa hlaheloa ke kotsi ea koloi, Ribaneng, Ha-Thakabanna, ha li ne li lokela ho tla sebokeng, Ha-Foso ka Labosupa le fetileng, tsa hloloa ho finyella.

Monghali Maimane Maphathe, o re sena se latela hore bese e neng e se e palamisitse litho tsa DC tse mashome a mane, e hlolehe mariki le likere, eare ha e lokela ho tsubella selomong, moqhobi oa eona, a e loantša ho fihlela e oela ka lehlakore, ’me batho ba pholoha. Hlephe

Mofu o etsa mehlolo polokelong ea litopo Botha-Bothe

Lelapa la mofu oa Pela-Tšoeu Matube Ha-Motšoane, Leribe ea fetohang litšobotsi, le re le kopa boeletsi na le lokela ho tsoa ka lefe lekhalo, ka ka tsietsi ena e le tobileng, hoba e le phahametse.

’Mapontšo Lebitsa, morali oa mofu, o re ’m’ae ea hlokahetseng ka la borobong la khoeli ena a lla ka lehlaba, setopo sa hae se etsa mehlolo ka ’moshareng, hobane se ile sa fetoha litšobotsi ka makhetlo.

O re kamor’a matsatsi a mararo ’m’a bona a ile polokelong ea bafu, ba ile ba letsetsoa ke ba ’moshara hore ba itlalehe teng, ho fihleng ha bona, ba fumane karolo ea ’mele, tlas’a letheka e le eena, empa kaholim’a lona a ruruhile le litšobotsi e se tsona.

O re ho feta moo, setopo se litšobotsi tsa monna ea beotseng litelu, sa ba sa betla meno nakong ee moena oa mofu a neng a re eo ha se moholoana’e eo a ba a sisinyeha sa-mokana a phela. Teanye

Moshanyana o isoa lehaeng, ka thuso ea mokhatlo o buellang litokelo tsa batho ba tlokotsing

Moshanyana ea lilemo li peli oa Semphethenyane, lebatooeng la Lithoteng, Maseru, o ile a ntšoa tlokotsing ea bophelo boo a neng a bo phelisoa ke ntat’ae le nyatsi ea hae, ka ho isoa lehaeng ka thuso ea mokhatlo o buellang litokelo tsa batho ba tlokotsing, ka Lapele la beke ena.

Molula-setulo oa mokhatlo, nkhono ’Mamokete Sebatane, o re sena se latela hore mokhatlo o nyenyeletsoe ka boemo ba ngoana ke ea ileng a bona ho sohlokeha hae, ’me oa fumana hore ha a na tlhokomelo e ntle ebile ha a isoe litsing tsa bophelo, ho alafshoa bokulo bo tšoereng.

Litaba tsena li bile tsa tsebisoa komiti ea Molao le Polokeho ea sechaba, e bileng ea etsa matsapa a hore ngoana a tlohe matsohong a bao, molemong oa polokeho ea hae, ha ho ntse ho etsoa liphuputso ka tšoaro e mpe ea hae. ’Mathabo

Boemeli ba batsoali ba bana ba sekolo bo kopana le mookameli oa likolo tsa sechaba Maseru

Mookameli oa likolo tsa sechaba, Maseru, monghali Motsamai Motsamai, a tlatsitsoe ke mohlahlobi oa likolo Maseru, o bile le phutheho le boemeli ba batsoali ba bana ba sekolo sa mathomo sa Phethahatso, mookameli oa sekolo le ea tšoereng molepo botsamaising ba sekolo ka Laboraro lena.

Phutheho ena, e ne e le holim’a boto ea tsamaiso ea sekolo seo e ntseng e e-so hlomamisoe, esale e khethoa ka Mphalane ea ngoahola. Batsoali ba re ba ne ba romelle mabitso a litho tse ncha le mangolo a bona a thuto ka mor’a likhetho, ’me ba makatsoa ke lengolo le reng letona la Thuto le re boto e khethiloe hampe.

Khang ea batsoali ke hore ha ba lumele hore letona le chulo joalo, hobane ha le e-so bitse ba neng ba tsamaisa likhetho tseo, ho ba hlalosetsa hore ba fositse kae. Ba re ba makaletse mookameli oa nakoana oa sekolo le setho sa boto e fetileng, se tšoereng molepo, ba ntse ba tsoelapele ho etsa mosebetsi o lokelang ho etsoa ke e ncha, o kang oa khiro ea litichere.

Ho feta moo, ba re ba nyarositsoe ke mookameli oa sekolo ea entseng khoeheletso e reng batsoali, ba tlo khetha komiti e ncha ka Labosupa la beke ena. Phuthehong ena, ho thontsoe batsoali ba tlo mamella ba bang, ba tsamaisana tsela le mokhethisi ea neng a tsamaisa likhetho tsa boto e neng e lokela ho hlomamisoa, ba lelekiloe ka phuthehong.

Ho sa le joalo, batsoali ba neng ba khethetsoe ho tla mamella ba bang, esale ba lelekoa ka phuthehong ho tloha ka hora ea borobong hoseng, ho fihlela ka ea leshome le metso e ’meli, bookameli ba sekolo le ba likolo tsa sechaba, Maseru, bo ikoaletse ba le bang.

Litaba li sa le joalo, mehloli e ka har’a lekala la Thuto, e supa ha bothata ba tlhomamiso ea boto bo se ho letona joalo ka ha lengolo le cho, empa e le tse ling tsa liofisiri tsa lekala tseo ha boto e ka ea hlomamisoa li leng letsoalong la ho ea toronkong ka baka la bobolu. Mokhethi

Lekhotla le Phameng la Lesotho le tla qala ho mamelisisa nyeoe ea Koro-Koro, ABC le ntlokholo ka Laboraro la beke ena, kapel’a Mahase ACJ, ka taelo ea Lekhotla la Maipiletso e tsoileng ka Lapele la beke ena.

 

Mahase ACJ o bolelletse liakhente ka Labobeli lena hore o lokela ho thuta lipampiri tsa nyeoe tsa mahlakore ao a qothisanang lehlokoa ‘moho le ho ithuta molao oa motheo oa Kobotata a tle a tsebe ho utloisisa ntho e tsekoang.

 

O buile a re bohle ba lemohe hore ho ea ka tsamaiso e nepahetseng o ne a lokela ho ba le matsatsi a mabeli a ho ithuta nyeoe eo, athe lekhetlong lena, o bile o filoe lipampiri tsa eona a se a kena ka khotla.

Monna o shoa ka mor’a ho khakhathoa ke mahokela a Mpharane, Leribe

Monna oa Maputsoe Ha-Maqele, Leribe, o shoele ka mor’a ho khakhathoa ke mahokela a Mpharane, a ne a mo belaella bosholung ba thepa e neng e ntse e sebelisoa lefung, motseng oo, ka Sontaha se fetileng.

Mpho Mokhosi, khaitseli ea mofu, o re mofu, o ne a ile a tloha hae a ea Mpharane mosebetsing oa hae, ha a fihla, a fapohela moo ho neng ho bolokoa mofu ka la maobane, empa mong’a ntlo a re o ’melaella bosholung ba thepa ea hae.

O re mong’a thepa o ile a letsetsa mahokela a ileng a fihla, a botsa ’melaelloa lipotso, a se a bile a ntse a mo khakhatha, a mo isa moreneng oa motse oo, ea ileng a a etsetsa lengolo la ho ea secha habo mofu, hona tsatsing leo.

O re mahokela a ile a mo isa moreneng oa Ha-Maqele, a ilo kopa tumello ea ho kena habo monna eo, moo a ileng a se ke a fumana se batloang, a khutlela Mpharane, ha monna a ile a potlakisetsoa sepetlele Motebang, ke mok’hanselara, a timela hamorao. Sepeka

Bashanyana ba babeli ba bolaile monna ea phelang le ’m’abona, Mafeteng

Bashanyana ba babeli ba boaile monna ea neng a phela le ’m’aboba oa mohlolohali ka molamu le ka thipa, ka Laboraro le fetileng, Thaba-Tšoeu Ha-Mphatle, Mafeteng.

Mok’hanselara oa tikoloho eo, e bile a amana le mofu, o tlalehetsoe hore monna ea neng a se a lula habo bashanyana bao ka tsela ea bochaufa, e mong oa bona, o ile a ’mata ka molamu, ha e mong a ile a mo nyekenya ka ntho e bohale molaleng, ha ba qeta ba ipha limenyane. Thulo

Letona le kopana le moifo oa BKB

Letona la Likhebo tse Nyenyane, le re le kopane le boemeli ba BKB ka Lapele la beke ena, ho tšohla lintlha tse lokelang ho lateloa thekong le thekisong ea boea ba

farelane le seiboko ba lihoai tsa Lesotho, ’me lekala la habo le boemong ba ho thusana le bona.

Monghali Chalane Phori, o re o ba tataisitse holim’a lintlha tseo ba lokelang ho li latela, tse kenyeletsang ho kopana le Molekhetho le lekala la Temo ho hlopha mokhoa oa tšebetso ‘moho, le methati e meng, ’me boemeli boo, bo itse bo sa khutlela morao ho ea shebisana lintlha tseo le boto, bo tla boea sekoele.

BKB e ne e emetsoe ke monghali Isaki Staats, ka boemo ba hae ele ofisiri e kholo ea BKB. Puisanong le Lehakoe la litaba bekeng e fetileng, o ile a re o etsa sena molemong oa Mokhatlo oa Seiboko le Farelane, Lesotho. Mokhethi

Basali ba masole le mapolesa ba tsetselela toka makhotleng a boahloli

Lekomo

Ba bang ba basali ba masole le mapolesa a tšoeroeng le ho akheloa ntloana-tšoana nako ea selemo ho ea ho tse peli ke ’muso o litulong, ba re balekane ba bona ba fuoe beili, balekane ba bona ba sebeletsoe ka toka ke ’muso le makhotla a Lesotho.

Tsena li builoe Lekomong la Labobeli lena li manolloa ke monghali Kuoane Ramatšella a tšoere tokomane ea basali bao, e lokolisitseng lintlha tse ngata, tse totobalitseng bokakalope ba batšoari ba bona, ka ho otloloha, balli ba tseka hore, banna ba bona ba lokolloe ka beili, ba tsebe ho itlhphela liqoso tse ba tobileng, ka bolokolohi. Hlephe

Ntoa ea Kobotata e khutletse Lekhotleng le Phahameng

Kahlolo e reng liakhente tsa Kobotata li khutlele Lekhotleng le Phahameng ho ea ngangisana ka likhang tsee li sa kang tsa ngangisana ka tsona pele nyeoe eo e hloella Lekhotleng la Maipiletso,11 e bakile molumo o mongata har’a sechaba.

Probonong ea Labobeli lena, ho ile ha hlaha potso e reng na ha e le moo nyeoe e tla boela e mameloa ke Mahase ACJ kapa moahloli ea tlang ho khethoa ke eena, e ba ho ka etsahala hore moahloli a liehe ho fana ka kahlolo, na Korokoro e tla etsa joang.

Hape, ha e ba kahlolo e ka tsoa ka pele, e bile e le molemong oa Korokoro, joale Ntlokholo ea Kobotata e hlahlela boipiletso hang, e kopa hore Lekhotla le Phahameng le thibele phethahatso ea kahlolo, teng ho tla etsoa joang.

Ke moo bamameli ba ileng ba lemoha hore ho fela ho betsoa morabaraba o thata ka lekhotleng ka moo, oo ha ba sheba ka leihlo la moea, ba boning Komiti e Kholo e tla qetella e fihletse se hlokoang ke eona, ka lebaka leo Korokoro le ba khemang le eona ba hle ba ikente ka ente ea lipere, nako e sa lumela. RK.