Bakhethi ba re Amerika e tlaleheloe ho koaloa ha MOAFRIKA FM

Lesotho—Bamameli ba re ’MaAkooa a bolelloe ka ho koaloa ha Moafrika FM. Liqhooku tse peli tsa MOAFRIKA li boloka bafu Evatone le Tsikoane. Ho tla behoa bo-fatere ba bararo ba Chache, hosesane, Mohalesuku.

Bakhethi ba Lesotho ba re Moemeli oa Amerika naheng ena a bolelloe hore ’muso oa lesotho o honyelitse khaso ea Moafrika fm, khahlanong le lipehelo tsa molao oa motheo oa naha ena, le litumellano tsa machaba, empa o ipolelisaka e le oa puso ea sechaba ka sechaba, o hlonephang puso ea molao.

Ba buile tsena Pusong ea Sechaba ka Sechaba kamor’a ho utloa hore molao oa motheo oa Amerika o hanela paramente ea moo ho etsa molao o phubulang sechaba molomo ka ho koala litsi tsa khaso le tsa phatlalatso, joalo ka ha ho kile ha etsahala Lesotho mona, pusong ea manasi le ha ho boetse ho etsahala pusong ena ea lephele, e leng ea selekane sa manasi, matoala, maholosieane le malekana.

Lebaka la bona ke hore, ho ea ka puso ea Amerika, ha ho naha e hatikelang litokelo tsa mantlha tsa botho, e lokelang ho fumana molemo oa likamano tse mofuthu le USA.

Likamano tseo, har’a tse ngata ba itse ke monyetla oa Lesotho oa ho romella lihlahisoa tsa eona limmarakeng tsa naha eo, ’moho le ho bitsoang Compact, e leng tsee ’muso oa Khokanyanaphiri li neng li tšosoa ka tsona ha o tla qetella o lokollotse Lt Gen Tlali Kamoli mosebetsing, ’muso oa liphiri o hlabile ka tsebe.

Bakhethi ba Lesotho ba laetse ke hona hore Mohlomphehi Mohlophisi e Moholo a batle mekhoa ea ho kopana le Moemeli oa Amerika ea Lesotho, a mo bolelle hore Lephele le koetse Moafrika fm, o sa latela litsela tsa molao tsa ho etsa joalo, ha e ba ho bonahala ho e-na le lebaka le ka isang moo.

Ba sebelisa tokelo ea nona ea ho fana ka maikutlo, bakhethi ba ile ba fetela moo ba neng ba supa makhabane a puso ea litonakholo tse peli tse keneng ka ho latellana le neng beanghali Pakalitha Mosisili le Motsoahae Thabane.

Ba itse makhabane a Dr Mosisili a akha: khaho ea likolo tsa maemo hohle kahar’a naha, thuto e lefelloang ke ’muso, ho tlisoa ha Limkokwing Lesotho, likonteraka tsa ho tlhatlehela bana likolong, lijo tse sa lefelloeng ke batsoali tsa bana ba likolo, khaho ea litsi tsa bophelo, ho se lefelloe ha litšebeletso le tsa bophelo, ’moho le kanetso ea litsela tsa sekontiri, har’a tse ngata.

Ba re makhabane a Dr Thabane ke ho phethola makote le litaelo tsa Tokho-tokho har’a tse ngata. RK.

Liphupu

Labotšelela la mafelo ana a beke ke la ho bolokoa ha bang ka liqhooku tsa MOAFRIKA, Khauteng, moo ho bolokoang Nkhono ’Matatolo Lehlaha, motsoali oa Mookameli oa MOAFRIKA FM ka Bochabela.

Tsikoane Ha Matlaselo Molapo teng ho bolokoa ’Mabohlokoa Molapo e leng morali oa moholoane oa Khunyakhunya ea Setloholo, ’M’e ’Makhatebe Maope, mofu ea siileng monna le ngoana ea lilemo li peli, o shoeletse kotsing ea koloi ea baeti.

Mrs Maope ke setotla se neng se etelletse mokoloko oa Honyolla-MOAFRIKA pele, o lotiloe ke Selata sa Thipa ea Setloholo, ’Matšolo Morie, oa Teyateyaneng Ha Ntjabane. RK.

MathulaBofatere ba bararo ba tla tlotsetsoa tšebetso, ke Bishop Adam Mallane Taaso ka Labosupa la mafelo ana a beke, e le tlotso ea mashome a mabeli, lilemong tse leshome tsa bookameli ba hae Kerekeng ea Chache, Lesotho.

Fatere Mathula Manyabeane oa Cathedral ea St Mary’s le St James, Maseru, o re bofatere bao, ba tla sebetsa St John The Baptist Ha Majara e Leribe, St James e Pitseng Ha Raphoka, hona Leribe, ha oa boraro eena a tla ba St John’s, toropong e Mafeteng. RK.