Mapolesa a ntlokholo a hloloa ho namolela mohlolohali oa Lechalaba

Lesotho—Nkhono Nthatisi Lechalaba o re ba ntse ba e-s’o fumane thuso khahlanong le lelapa le ba sotlang, e le bahlolohali ba Paul Lechalaba hoo eena a seng a bile a phela kamor’a sehlahla, a balehisitse bophelo ba hae, ’me ha a tsebe hore na bana le litloholo tsa hae ba itšuntse kae.

O re akhente ea hae e ntse e le sieo ka mabaka a lelapa la habo eona, e neng e lokela ho ba thusa ho fumana taelo e ncha ea lekhotla e laelang mapolesa ho tšoara bahlorisi ba bona, tlas’a tlolo ea molao ea nyeliso ea litaelo tsa lekhotla.

Nkho o re, ho ena le hore mapolesa a tšoare bahlorisi ba bona, a batla ho ba kopanya, ba buisane, e leng see a sa se lumeleng, ka le reng eena o batla hore ho phethoe taelo ea lekhotla le phahameng, ka lehlakoreng le leng, mapolesa a tšoare a be a qose batho ba mo senyelitseng thepa, ba mo tšosa ka lefu ba ba ba fosa setloholo sa hae ka sethunya. RK.