Moseneke o khalema bompoli ba paramente le ’muso oa Lesotho

Lesotho—Moahloli Dikgang Moseneke o khalemetse ka matla, bompoli bo etsoang ke ’muso oa naha ena le paramente ea habo eona e khantšang matla a bongata le ha ho se ho sebetsoa litaba tsa bohlokoa tsa naha, e leng tsa tlhophobocha.

Monghali Moseneke o entse khalemo ena kamor’a ho utloa tlaleho ea komiti ea Meralo ea tlhophobocha, ka Laboraro lena, ’mokeng oa boetellipele ba sechaba sa Basotho, le ho utloa khang ea bohanyetsi holim’a tlaleho e reng ho se ho na le kasete e tataisang tšebetso ea tlhophobocha e entsoeng ke paramente.

Boetellipele ba bohanyetsi bo ne bo ile ba bolella Moseneke hore ha bo e-s’o bone kasete ena e seng e phatlalatsoa ka ’mokeng, feela see ba se tsebang ke hore ba ne ba ntse ba khalemela ’muso ka paramenteng ha o ne o batla ho fetisa molao o kena-kenanang le MoU ea bohanyetsi le ’muso, e supang tsela.

O bile a toba ’muso le maparamante a oona a re ba ntše matsoho a bona tokomaneng eo, e se re ba nyopisa mosebetsi o fihletsoeng ka thata, a ba supa hore maparamente a lokela ho fua thupelo holim’a tšebetso ena, a tseba ho utloisisa moeli oo a lokelang ho sebeletsa kahar’a oona.

Tonakholo Motsoahae Thabane o ile a ema a ikokobelitse a kopa monna eo oa Tšoane ea ’Mameloli hore a se ke a mpa a ba ngala, o tla buisana le lehlakore la habo, hore le theole moea, mosebetsi o etsoe ka makhethe.

Ho feta moo, ho lumellanoe, ke baetellipele hore ’moka oa sechaba sohle o tle o be ka la mashome a mabeli a metso e tšeletseng, ho ea ho la mashome a mabeli a metso e robeli, molemong oa ho o hlophela hantle. ’Muso o ne o supile hore o tla tloha ka la mashome a mabeli a metso e meraro.

’Mokao neng o ile oa buloa ke tonakholo ea naha ena, monghali Motsoahae thabane, o ile oa koaloa ke moetellipele oa bohanyetsi, monghali Mathibeli Mokhothu ea ileng a tiisa hore ’muso o ikemiselitse ka matla ho nyopisa tlhophobocha, ka ho fokolisa matla a tumellano ea ’muso le bohanyetsi, a ba a kopa Moseneke ho thusetsa.

Ha ho ntse ho buisanoa ka bokamoso bo tataisoang ke MoU ea ’muso le bohanyetsi, Lekhotla la Molao oa Motheo la Lesotho lona le ne le phathahantsoe ke nyeoe e qholotsang temana ea leshome ea MoU, ’me marang-rang a re lekhotla le ahloletse balli hore Monghali Mothejoa Metsing a tle a tobane le bohale ba molao mohla a kenang Lesotho. RK.