Lekhotla le Phahameng le qhalile nyeoe ea tsekisano ea bahlolohali ba Paul Lechalaba

Lesotho—Lekhotla le Phahameng la Lesotho le re khang ea bohlahlami le bojalefa ba mobu oa Paul Lechalaba ea hlokahetseng khale e isitsoe lekhotleng leo ka phoso, ka ha e le ea basali ba reng ba ne ba nyetsoe ka lenyalo la likhomo, ho bile ho sena bopaki bo tiisang hore ba ne ba fela ba nyetsoe ke Lechalaba.

Lekhotla le laetse ke hona hore khang ena, ba e ise makhotleng a Basotho ka ha e le ’ona a nang le matla a molao a ho tseba hore na bo-nkhono le mora oa e mong oa bona, ba fela ba ne ba nyetsoe ke Paul Lechalaba hoo bona le mora eo oa e mong oa bona ba ka tsekang mobu oa mofu.

Ha ba ntse ba sebetsana le ho otlolla ho nyaloa le ho tsoaloa ke mosali ea reng o ne a nyetsoe ke Paul Lechalaba, bohle ba laetsoe ke Moahloli ’Maseforo Mahase ho phelisana ka khotso moo mofu a ba siileng teng.

Moahloli o bile a re taba e totobetseng ke hore mofu o ne a nyalane le e mong ’Maseipati Sarah Lechalaba ea seng a ile ho o batang, ea hlalosoang e ne e le moholoane oa balli, ha Makhala Lechalaba ea itlhalosang e le mosali oa matsoathaka, ho hlahella hore pele a kena ha Lechalaba, o ne a nyetsoe ke e mong Lebohang Lipholo.

Balli e ne e le Nthati Lechalaba le Nthatisi Lechalaba, baikarabelli e ne e le Mathabeng Khopotso Lechalaba, Makhala Lechalaba, Estate Lechalaba, Salman Hardware le ba bang.

Nyeoe ena e ne e qale ho mameloa ka selemo sa 2016 khoeling ea Tšitoe ea mameloa makhetlo a mararo selemong se hlahlamang, ka ho fapakana ha likjhoeli, e oele mafelong a khoeli e fetileng. RK.