Litumellano tsa lipuisano tsa ’muso le bohanyetsi

Lesotho—’Muso o lumellane le bohanyetsi, kapel’a Moahloli Likgang Moseneke hore monghali Mothejoa Metsing a tle hae pele lipuisano tsa tlhophobocha li simolla, ’muso o mo fe tšireletso ea linako tsohle le litokelo tsohle tsa hae tse hlahang molaong, ’me, a se ke a qosoa ho fihlela Tlhophobocha e fihletsoe.

 Hape, ho lumellanoe hore ’muso o tla hlonepha litaelo tsohle tsa makhotla a boahloli; oa mpa oa kopa ho ekeletsoa nako ka likhoeli tse peli ho honyolla MOAFRIKA FM le hoja kopo eo e sa ka ea amoheleha, ha mpa ha lumellanoa hore e tla ba ka pele ka potlako.

 Beke ea pele ea Pulungoana e tla ba ea seboka sa boetellipele moo ho tlang ho shebanoa le likhothaletso tsa NDPC lintlheng tse tšoanang. NDPC ke komiti ea Meralo ea Tlhophobocha.

 Taba e sa hlakeleng bookameli ba MOAFRIKA ke hore na tumellanong ena, ho thoe litšenyehelo tsa eona, tsa ho tlosoa moeeng ka nako e telelehali ena li tla jaroa ke mang.

 Mohlomphehi Mohlophisi e Moholo o re karolo eno ha e na molemo se-ea-lemoeeng sena sa Molimo, ha e ea ipapisa le taelo ea Lekhotla le Phahameng la Lesotho e reng ho se be mohla ’muso o ka tlosang MOAFRIKA FM moeeng, ntle le ka litsela tsa makhotla a boahloli feela.

Ka lebaka lena, o re ho hlakile hore o ntse a tla lokela ho ea kokota makhotleng a boahloli, hore ’muso o nkoe o nyelisitse taelo ea oona, ka lebaka leo, o qobelloe ho ikokobeletsa taelo eo ea Moahloli ’Maseshophe Hlajoane, o honyolle MOAFRIKA o be o lefe litšenyehelo tse bakiloeng ke ho honyetsoa hona ho seng molaong. RK.