Labobeli lena ke la makhaola-khang lipakeng tsa ’Muso le Bohanyetsi

Lesotho—Lingangisano tsa ’muso le bohanyetsi bo ka paramenteng li ile tsa thatafala letsatsing la pele la tsona ha e re ha bohanyetsi bo teka likhang tsa bona e be ’muso o li bitsa boiqapelo, ha se litaba tsa ’nete, bohanyetsi bo fane ka bopaki.

 Bo-es’a, e leng la bobeli la lipuisano, bohanyetsi ba hlaha ka patantahali ea litokomane tsa makhotla, ka ho otloloha, litaelo tsa makhotla tsee ’muso o ikhakanyelitseng tsona, tse akhang e thibetseng Lekala la Likhokahanyo ho koala litšebeletso tsa khaso, tsa MOAFRIKA FM.

 Se hlaketseng bohle, ke hore lipuisano tse hopoletsoeng ho fella kajeno, li hole haholo le polotiki, empa, li holim’a molao le toka, hoo banna ba neng ba thatafaletsoe, motho a neng a thetha sekhohlela a sa tsoa se thetha.

 Bopaki bo bong, bo bonahalang bo tla tsitsipanya ’muso ke ba lethathamo le le lelele la mabitso a batho ba shoetseng matsohong a mapolesa ho tloha ’muso ona o lutse sa maratsoana, ’me ho bonahale e le mafu a ntse a tsoelapele.

 A morao-rao a mabeli. Ke a monna ea bolailoeng ke mapolesa bosiu ba Labosupa le fetileng, Motimposo Ha Majara Theko, Maseru, le leng ke la monna ea shoetseng matsohong a mapolesa a Matelile, ka Laboraro la beke e fetileng.

 Justice Likgang Moseneke o tla lehoha hore Matelile e se e fetohile selakhapane sa batho, ka ha e mong, ’Musi Mokhoboheli a ntse a ile a shoela matsohong a mapolesa a teng.

 Momameli o tla hopola hore polotiking, motho a ka ipuela eng kapa eng feela e tlang ho mo fa molilietsane kapa menoana e mengata likhethong, athe molaong ho hlokoa bopaki ka mefuta e mehlano ea bona. RK.