Basotho ba thabetse ho utloa lentsoe la rankulikae oa Ha Mojakisane

Lesotho—Basotho ba ile ba nyakalatsoa ke ho utloa hore monghali Khotsang Moshoeshoe o ne a phela, le hoja lentsoe lona le ne le utloahala hore ke la motho ea fokolloang ke bophelo, ea mpang a itiisitse feela.

A bua ka nako ea ho bonoa ha baeti, sepetleleng sa Mokhotlong, Monghali Moshoeshoe o re mapolesa a re a laetsoe ke Maseru hore a se ke a mo lokolla le hoja lingaka tsa sepetlele sa setereke sa Mokhotlong li itse a lokolleloe lelapa a tle a okoe ke lona.

Le hoja a le boemong boo bo hlobaetsang ba bophelo, Mokuena o itse o khothetse hore bothata ba banna le basali ba habo, boo a hlokofatsoang ka lebaka la bona, bo haufi le ho fela.

Hape, o itse motho ea tla leka ho ntša boea Lesotho ka thoko ho mokhatlo oa borankulikae, o tla lokela ho ea bo hlahlobela New Zealand, ’me ho ea moo bo seng bo tla nenoa ke bareki ka le reng ke boea ba mali, joalo ka ha ho ne ho etsahala ka litaemane tsa Liberia, lilemong tse fetileng.

Ho sa le joalo, borankulikae ba Semananyane ba ntse ba tsoelapele ka mokuto oa linku tsa bona. Maobane ho ne ho kuta mokhethoa oa Malingoaneng, monghali Serialong Qoo. RK.