Litotla tsa Setloholo li tla isa lengolo ho Thesele ’Maseribane bekeng e tlang

Lesotho— Litotla tsa setloholo, batšehetsi le barati ba MOAFRIKA FM ba makhatheng a ho thetha litlhopho tse isang mokolokong oa ho isa lengolo la litletlebo ho letona la likhokahanyo bekeng e tlang.

Litotla tse neng li isitse kopo ea tumello ea mokoloko oo, li re mafapha ’ohle a amehang a li lumelletse, e leng mapolesa a toropo ea Maseru le Lekhotla la Motsemoholo, li se li sallane le khatiso ea likipa tsa letsatsi leo feela.

Bohle ba nang le thahasello ea ho honyolloa ha MOAFRIKA, ba kopjoa ho itlhophela Labone la beke e tlang e tle e be la mokoloko o moholohali, hape, ba itokisetsa ho reka likipa, ’me bahoebi ba ka thusang ho bebola theko le khatiso ea tsona, ba kopjoa ke tsona ho etsa letsoho la monna ka ho letsetsa ka Mokhorong oa Moafrika ka linako tsa mosebetsi.