Khotsang Moshoeshoe o khutletse sepetlele e ntse e le motšoaruoa

Lesotho— Sepolesa sa Mokhotlong se buselitse monghali Khotsang Moshoeshoe sepetlele, moo a tla boela a lula tlas’a leihlo le nchocho la lingaka le baoki ba koetlisitsoeng.

 Sena, monghali Moshoeshoe o re se latela hore a lokolloe hoseng ha La-pele lena, tlas’a pehelo ea hore a be phomolong ea bokulo ka matsatsi a supileng a latellanang ho tloha nakong eo ea tokollo ea hae sepetlele, empa e re ka ha a ne a isitsoe sepetlele ke mapolesa, a lokolleloa oona.

 Ha a fihla sepoleseng le eena, o re a ile a mo akhela ka setokising, a sa natse lipehelo tsa ngaka ea ’muso, ea setereke sa Mokhotlong e neng e ile ea bolella mapolesa tlohileng le eena sepetlele hoseng, hore lefu la hae le hloka hore a be moo moea o leng mongata, athe setokisi sona se bipetsana.

 Kamor’a nako e itseng, o re mapolesa a ile a mo isa lekhotleng la ’maseterata oa moo, teng a ikoalla le mochochisi, a sa tsebe hore na a ntse a fonoka eng, ha a tsoa ka moo, a be a se a qhobeloa sepetlele, moo lingaka li ileng tsa mo tšoara, tsa mo akhela betheng.

 Ho sa le joalo, Moahloli ’Maseshophe Hlajoane, o tla tsoha a mamela kopo ea hae ea hore a lumelloe ho ea kopana le lingaka tsa hae tsa litsebi, Petermaritzburg, Natala, ka litšenyehelo tsa hae, kapa ka tsa ’muso ha e ba o khetha hore a se ke a ikisa, a mpe a isoe ke oona. RK.