Lilaphalapha o hatisitse khaolo ea bone ea lipale tsa hae tsa thelebishene

Lesotho—Sehlahisoa se secha sa lipale tsa Lilaphalapha se tla ka ’na sa fumaneha ho ea mafelong a selemo sena, e le khaolo ea bone ea likhatiso tsa sehlopha sena sa liqaboli tse eletsang sechaba mathateng a fapakaneng a bophelo, ka papali ea kalaneng, e seng e ena le bolateli bo boholo Lesotho le Afrika Boroa.

Ka ho otloloha, tlhahiso ea bone ea Lilaphalapha e lemosa batho ba tlang Maseru hore bophelo ba motsemoholo ona ha bo hlile ha bo monate oa lamunu joalo ka ha toropo ena e bitsoa, empa ke moo ntja e jang e ’ngoe, batho ba itlontlollang feela, ha boitlontlollo boo, bo ka ba thusa ho koala lephako kapa ho tlosa lenyora.

Likhatiso tsa eona li ntse li nkeloa Qoatsaneng, Marabeng Ha Seetsa, C-Point le Khubung ea Toropo ea Maseru, Khubetsoana, Ha Seoli le Thibella. Libapali tse kholo tsa eona ke Bofihla ’Neko, Silas Monyatsi, Thuso Dlamini, Shoaepane Sehahle, Tieho Khakhau, Tseko Monaheng, ’Maselebeli Monare le Matšeliso Mohale.

Monghali ’Neko o re setšoantšo sena se tla romeloa mose ho maoatle ho ea thulanngoa le tsa linaha tse ling, litlholisanong tsa machaba, se nto hasanngoa le lithelebishene tse ka khahloang ho so bontša kae kapa kae lefatšeng, ’moho le ho se rekisetsa sechaba.