Moseneke o kopana le Metsing ka Labobeli lena Pitoria

Lesotho—Justice Likhang Moseneke o tla kopana le moetellipele oa Nonyana e Kholo ka Labobeli lena, Pitoria, Afrika Boroa ho utloa lehlakore la hae malebana le se lokelang ho etsoa hore a tle a qetelle a tlile hae ho tla kenela lipuisano tsa tlhophobocha ea litaba tsa Lesotho.

A bua ka mohala le Manonyana, sebokeng se neng se buletsoe sechaba sohle, Mahobong, mafelong a beke e fetileng, monghali Mothejoa Metsing o bile a re ha a na ho ikamahanya le bosoasoi ba tonakholo ea Lesotho, ba hore a tle Maseru, kopanong ea bona ea metsotso e leshome le metso e mehlano ka letsatsi lapele la Phato ena.

Ho sa le joalo, Mohlomphehi Mohlophisi e Moholo o re haele mona Justice Moseneke a bonahale a tšoere thifa tjena, a sa tantšetsa katara ea ’muso joalo ka Matonto, ho tla nepahala hore a hapelle liakhente tse kholo lethathamong la hae la bao a lokelang ho teana le bona tokisetsong ea ’moka oa sechaba oa tlhopho-bocha.

Mohlomphehi Mohlophisi e Moholo o re banna bao, Zwelakhe Mda, Motiea Teele, Karabo Mohau le Qhalehang Letsika, ke bona ba ka thusang Moseneke ho utloisisa bothata ba litaba tsa Lesotho ka ha e le bona ba tšoereng tau ka litlena ba buella boholo ba mapolesa le masole a qosoang sepolotiki ’moho le Moahloli e Moholo, ’me ba se ba ’nile ba tabanya ’muso ka linyeoe tsena tsa sepolotiki.

Ho feta moo, o re Justice Moseneke o tla fumana hore balateli ba ’muso, ke ho lemoha matla a Adv Zwelakhe Mda, KC ntoeng ena ea ho tsekella puso e ntle Lesotho, ba ile ba senya ofisi ea hae ea boakhente ka liqhomane, ’me ho fihlela lena le holimo, ’muso ka mapolesa a oona ha a eso etse letho ho fumana linokoane tseo mohlala oa tsona o bonahalang kahar’a oona. RK.