Linku li fumanoa ka thuso ea mokhosi ho MoAfrika FM

agriculture-animals-baby-288621

Linku tse mashome a mane a metso e robeli, tse ileng tsa utsoetsoa molisana oa tsona ka lithunya, motebong o Thaba-Putsoa Ben Fall, ka Labobeli lena, li fumanoe li nyahlalitsoe ke masholu har’a tsela, ka mor’a hore ho hlajoe mokhosi se-ea-le-moeeng sena hona letsatsing leo, lenaneong la Majalefa a Lesotho.

Ea phurileng leshoetla le Lehakoe la Litaba e le molisana oa tsona, o itse o ne a liselitse sebakeng se seng, a sa robile monakeli, lintja tsa bohola sa mokana ho e-na le see li se bonang, ha a hloelisa, a khahlametsoa ke kulo e ileng ea mo fosa, a atleha ho baleha.

O re o ile a mathela motebong ho ea lata fono, a ba a leba ho oa mphato oa hae hore ba hlabele ba hae mokhosi, masholu oona a qhoba linku, tsee hamorao eena a ileng a li fumana li nyahlalitsoe har’a tsela, kaha a ne a ntse a setse mohlala oa tsona morao.

Boto ea mokhatlo oa Bibele e hlophisitse lethathamo la eona la ts’ebetso, Nakong ea COVID-19

Boto ea Mokhatlo oa Bibele Lesotho, e bile tulong ea eona ntlo-kholo ea mokhatlo, Maseru, ka Labobeli la beke ena, moo e neng e ilo hlophisa lethathamo la eona la tšebetso nakong ena ea Covid 19, le tlang ho ipapisa le maemo a tla beng a rena ha nako e ntse e-ea.

Tsena li boletsoe ke setho sa mokhatlo, moruti Thabo Nthako, se itseng har’a tse tšohliloeng, ke mokete oa mokhatlo o bang selemo se seng le se seng ka Mphalane, o tlang ho tšoareloa kerekeng ea LECSA, Berea.

Moruti Nthako, o bile a re ho tla ba le seminari ea basali mafelong a khoeli ea Phato, ho feta moo seboka se neng se lokela ho ba qetellong ea khoeli ea ’Mesa selemong sena, se ile sa thisa ka baka la Covid 19, le sona se se se tla ba mafelong a khoeli eo ea borobeli.

Mookameli oa sepolesa sa Leribe, o behelloa ka thoko ho mesebetsi.

Police Headquarters

Mookameli oa Sepolesa sa Leribe, Sup. Thabo Tjamela, o behelletsoe ka thoko ho mosebetsi, ka lengolo, ke mong’a hae, ka le reng o hanne ho koalisa matlo a mothamahane a setereke seo, ka Moqebelo o fetileng.

Lengolo lee ho utloahalang ele la la mashome a mabeli a metso e mene khoeling ena, le fihlileng ho mong’a lona ka ’Mantaha oa beke ena, le re a ’ne a be ka thoko ho mosebetsi, feela a sa fuoe monyetla oa ho ikarabella.

Lehakoe la litaba le botsitse phala ea sepolesa sa Lesotho ka taba ena, eona ea li tiisa ka hore litaba tsa Sup. Tjamela, li tlasa lipatlisiso tsa sepolesa.

Ho sale joalo, o itse ke ’nete hore Monghali Monyane Moleleki o bile teng liofising tsa sepolesa sa Lesotho, ho ea fana ka lipatlisiso, le hoja a bile sechele hore na ke holima taba efe.

Seboko sa seqapi sa motlakase se utloahetse ho motlatsi oa Tonakholo ea naha ena.

Electronic transmitter

Seboko sa seqapi sa motlakase o fehloang ka metsi a pula, sa Ha-Sekoati, Mohalesuku, Monghali Keketso Thabaneng, se utloahetse ho Motlatsi oa tonakholo ea Lesotho, monghali Mathibeli Mokhothu, kamor’a puisano ea Hlao Rampaleng le Thabaneng, lenaneong la Nyakafatane la Laboraro lena.

Mohlomphehi Mohlophisi e moholo o ne a ile a kena lenaneong leo, a ts’episa hore o tla fetisetsa litaba tseo ho Smartman sa ’MaAmohelang, hore Lejantja leo le tšireletsoe, le be le thusoe boqaping boo ba lona.

Boitlhalosong ba hae, Thabaneng o re o ne a qape motlakase oo a le sekolong sa mathamo, ’me e se e le lilemo tse fetang bohlano a o sebelisa litšebelisong tsa katlung, tse kang ho tlhatleha le tse ling, empa ka mora ho eteloa ke batho ba neng ba batla a ba fe tsebo eo ea hae, o ile a qala ho hlaseloa ka lithunya le ho senyetsoa thepa, ’me o kopa thuso kaha o lahliloe kherehloa ke sepolesa sa mohalesuku.

‘Musi oa setereke sa Mokhotlong o re Basotho ba ele hloko maorolamo a ba jang lichelete ka sehloho.

Mokhotlong

’Musi oa setereke sa Mokhotlong, o re Basotho ba ke ba phaphame borokong ba ho be sale ba jooe lichelete tsa phetho ke maorolamo a ba tšepisang mesebetsi e sieo.

Monghali Serame Linake, o re o bua sena hobane ofising ea habo, ho e-na le lengolo la morafo oa Mothae o seterekeng seo, le arabang la hae le reng le batla lebitso la motho ea ntseng a tšepisa batho mosebetsi ka moo, a qetellang a ba thetsitse ka hore ba itlalehe mosebetsing ka matsatsi afe.

O re motho eo ea ipitsang Bereng Molapo, o batla batho chelete e makholo a mane le mashome a mahlano a Maloti hore a ba fe mosebetsi, ’me morafo o re ha o na motho oa lebitso le joalo

Morena oa Roma Mahlanyeng o kopela lesea le ’malona liphahlo.

Baby clothes on a whing

Morena oa Roma Mahlanyeng, Ha-Sehloho, Maseru, o re o kopela motsoetse le lesea ba leng sepetlele St Joseph’s, liphahlo, le litlhoko tse ling kaha ba se na tsona.

Morena Thabiso Sehloho o re tsena o li bua hobane ho bile le ketsahalo e bohloko, ea ho inola lesea ka ntloaneng, le neng le lahletsoe ka teng ke ’malona ka mor’a hore le hlahe, ka ’Mantaha oa beke ena.

O re ka mor’a hore ho hlajoe mokhosi oa hore lesea le ntse le ngaea ka ntloaneng, ho bile le baahi ba ileng ba phalla, ba le ntša ka sekoting sa lethete, la hlakoloa hantle le ho phutheloa ka tse mofuthu, la nt’o isoa sepetlele le ’malona, ’me litaba tsena, li se li tlalehetsoe sepolesa sa Roma.

’Malesea, o hlalosoa ke morena a le lilemo li mashome a mabeli a motso o mong, o na le ngoana ea hakanyetsoang lilemong tse tharo, ho feta moo motho ea mo etselitseng ngoana, o tlalehoa e ntse e le mohlankana oa motse oa habo ee litaba tsa hae li tla saloa morao.

Sechaba se nyolla monna ea sa tsejoeng, selomong sa Malothoaneng, Mokhotlong.

Mofuputsi oa litaba Mokhotlong, o re monna ee ho sa tsejoeng ha habo, o ile a potlakisetsoa sepetlele ke sepolesa, ka mor’a ho nyolloa ke sechaba selomong sa Malothoaneng, Ntlholoetsane, hona seterekeng seo, ka Labobeli la beke ena.

Monghali Mohlalefi Kokoropo, o re tlhaloso ee a e fumaneng, e re lehlatsipa le ile la bonoa ke molisana ea neng a alositse liphoofolo, a hlaba mokhosi, sechaba sa phalla sa le nyolla, sa le isa motseng.

O re monna o fumanoe a sa tsebe ho bua, leha e le ho etsa letho, a bile a tletse mali sefahlehong, ’me o apere ka mokhoa ona; baki ea letlalo e sootho, bokate e putsoa, o roetse lirifi tse tšehla. O re ha ho tsebahale hore na o fihlile joang sebakeng seo.

 

Moshoeshoe o khothaletsa khaho ea moruo oa taemane le boea.

Khotsong Moshoeshoe
Wool and mohair farmer Khotsang Moshoeshoe. (Photo by Samson MOTIKOE / AFP) (Photo credit should read SAMSON MOTIKOE/AFP via Getty Images)

Monghali Khotsoang Moshoeshoe o khothaletsa ’muso ona ho aha le ho holisa moruo oa Basotho ba metseng le ba metebong, ka ho tsosolosa theko le thekiso ea litaemane, ho li hloekisa le ho li betla, tsee Basotho ba kileng ba phela ka tsona.

Ka mokhoa o tšoanang, Selomo se itse mosebetsi oa ho hloekisa litaemane le ho li betla, e bile tšebetso ea ho reka le ho rekisa majoana ao a bohlokoa, ho ’nileng ha phelisa Basotho ba bangata, ka lebaka leo, ’muso oa Majoro le Mokhothu o lokela ho ikeletsa, o tsosolose mesebetsi eo ea boea le litaemane.

Monghali Sehloho Monatsi, moparamente oa Tlokoeng, o ile a kena lenaneong leo la Probono a tiisa hore tšebetso ea ho ohla boea, ke mosebetsi o bonolo.

O ile a bua ka moo batšoaruoa ba Mokhotlong ba etsang chelete ka eona ka teng, a mpa a fapana le ntate Khotsang mokhoeng oa ho ohla, ha Selomo se bua ka ho ohlela seropeng, eena a bua ka tšebeliso ea ’mankalanyane.

E mong oa banna ba kileng ba ba chankaneng ea Berea Teyateyaneng, le eena o ile a tiisa taba eo ea ho ohla le ho loha ka boea ba lipoli le ba linku ho etsoang ke batšoaruoa, ho ka fetoloang Industry ea bohlokoa.

Selomo se itse, tšebetso eo ea ho hloekisa le ho betla litaemane, ’moho le ea ho ohla le ho loha liaparo le mekhabiso ka boea, ho ka holisa bohahlaoli bo tsoang kantle ho naha, ha ba ha thusa khahong ea litsela le mabala a lifofane.

Monna oa Likhoele, Mafeteng o hlokomelisa sechaba ka litlokotsebe tse nkelang batho ka boqhekanyetsi.

Lesotho-Promise-diamond-replica-header

Monna oa Likhoele, Ha-Leutloileng Matsepe, Mafeteng, o re o hlokomelisa sechaba ka batho ba iphetotseng baqhekanyetsi ba rekisetsang ba bang thepa e sieo, nakong ena ee Covid 19 e baketseng malapa a mangata tlala, joale ba leka ho batla mekhoa ea ho iphelisa.

Monna ea itšebileng le Lehakoe la Litaba, o re o bua sena hobane e le lehlatsipa la banna ba Peka toropong, Leribe, bao a neng a utloetse hore ho bona, ho na le ea rekisang taemane.

O re o ile a etsa litokiso tsa ho ea ikopanya le monna eo, ka Sontaha se fetileng, empa ha a fihla sebakeng see ba lumellaneng ho kopanela ho sona, ba futuheloa ke banna ba neng ba se ba le moo, ba bileng ba ba k’hothotsa likete tse peli le makholo a mahlano a Maloti.

O re ba sa le moo, ha fihla mapolesa a mabeli a ileng a ba batla makholo a supileng a Maloti, ka mor’a ho ba botsa lipotso li se kae, a nto ba lokolla ho khutlela moo ba neng ba e-tsoa teng. Litaba tsena li se li phamotsoe ke DCP Motlatsi Mapola, ho li sebetsa.

Mohlankana oa Ha-Seshote o bolokoa a se na likarolo tse ling tsa ’mele.

Mohlankana oa Matsoku Ha-Seshote, Leribe, o tlalehoa a bolokuoe a se na likarolo tse ling tsa ’mele, ka Moqebelo o fetileng, tse kenyeletsang, meno le leihlo, ho feta moo, a bonahala a le maqeba a ho thunngoa hloohong, le a mangata a ho hlajoa ka thipa ’meleng, e seng a ho hlepholoa ke lintja.

Morena ’Maboitumelo Tau o re mohlankana eo, ke ee litaba tsa hae li neng li hlahelle qhooeng ena, li re o bolailoe ke lintja tsa habo a ile motebong, nakong ee a neng a ilo sheba lipere tsee ho neng ho sa tsejoe hore na li ile kae, eaba moo li mo harolang, tsa ba tsa ’molaea.

O re taba e makalitseng baahi ba motse oo, ke hore mong’a linyalasi le ba lelapa la hae, o ne a le sieo phupung ea mohlankana ka mabaka a sa tsejoeng, hobane tšebeletso e ne e tšoaretsoe ha e mong moholoane oa mofu, empa tebello e ne e le hore e tla ba habo lintja, kaha o ne a lula teng.

Morena ’Maboitumelo, o bile a re hona mafelong a beke eo, matlo a mong’a lintja a ile a chesoa ke batho ba sa tsejoeng, bosiung ba ha ho iloe tebelong ea mohlankana eo.