Moahi oa Ha Tsolo Maseru o re le joale, o ntse a e-so fumane setopo sa ngoana oa ’mangoana’e esaleng a noela nokeng ea Mohokare, ka Laboraro lena.

Monghali Teboho Lekhoakhoa o re ba ile ba theosa le noka e le lelapa le banna ba motse ba ba ba fihla Tongtonng ka Labohlano lena,moo ba ileng ba fumana monyenyetsi oa hore ho na le setopo se fetileng moo.

Lekhoakhoa o re ka Labotšelela lena ba hlotsoe ho boela patlong ka lebaka la likhahello tse itseng.

Mosali ea lilemo li mashome a mabeli a metso e tšeletseng oa Khubetsoana Salang Boinyatso, Berea, o re o utsoelitsoe koloi ke banna bao a sa ba tsebeng, ka molomo oa lithunya, bosiung bo neng bo sela Labotšelela lena.

Motheba Mohapi o re o ne a e-tsoa khahlametsa motsoala’e ka borokhong ba Maseru, ha e tla re ha a qeta ho emisa koloi a siea e mong, Khubetsoana, ha fihla banna ba bararo ba ileng ba ema ka pela koloi ba ba mo supa ka lithunya, monna e mong a roetse katiba ea thola-moea.

O re banna ba qetelletse ba ba koebetella ka moo ba qhoba koloi eo ba ea ba siea morung Matukeng, Leribe, ’me koloi ke ea BMW ea 1series e putsoa bo lefifi ea linomoro tsa M8485, lifono le likarete tsa libanka tse ba bileng ba ntša chelete kaha ba ne ba ile ba mo laela ho fana ka nomoro ea lekunutu. Ha ho likotsi tse bileng teng.

Moafrika Fm e na le lilemo tse mashome a mabeli a motso o mong e sebeletsa Basotho ka boitelo ntle ho tšekamelo ea letho ’me batšehetsi ba eona esale ba ntse ba re e hole, ho tloha ka 2000, ho rialo molulasetulo oa liphutheho tsa Moafrika nkhono ‘Mamokete Sebatane, empa litotla li re ha e ahoe.

Litotla ka molomo oa ’Matlotliso Masiloane li re li tla beha seroto moketeng oa Pitiki Vanrooi Ha Ralintši, Mafeteng, hore pokeletso e tle e be teng, ’me le linomorong tsa 06675, ba kekeng ba tseba ho finyella, ba ka tšela bohashana teng.

Moketeng oa Moafrika ho natefisa batho ka mekhahlelo e fapakana, e kenyeletsang libini tse tsanyaolelang sechaba ntle ho litefiso, ha e se ho reka ’mino oa tsona, ’me taba eo e li tsebahatsa ho batšehetsi ba tsona le ho li holisa. Ho rialo ’Mamatebele Mokoenehi.

Ntlheng ea Aletare ea Tefelo e simollang ka Labohlano, Bishop Liau Thoahlaka o re e tlisitse kholo e kholo khasong ea Evangeli, kaha ba qoqa Lentsoe la Molimo ba fanana monyetla oa lipotso ho ba sa utloisising.

Thabane o se ntse morero oa Likatana oa ho moamoha puso

Dr. Thomas Thabane

Morero oa likatana tsa Kobotata tsa ho suthumeletsa tonakholo ea Lesotho, Dr Motsoahae Thomas Thabane kantle ho puso le boetellipele ba mokha oo, o hlalosoa ke bamameli ba Pusong ea sechaba ka sechaba o bohotsoe ke linyalasi.

Ba bua ba ipapisitse le sehloho se reng Mens Rea le Actus Reus, Basotho ba itse mohlomphehi o bolelletse likatana, a eme thotobolong ka Labohlano la beke ena, hore o tla tloha boetellingpele ba mokha oo, mohla a ratang kapa a tlosoang ke seboka sa ABC, ho sa tsotellehe hore na e tla be e ntse e le tonakholo kapa ch

Ba itse tumellano e fihletsoeng ke Likatana le Malumara ea ho hlakola sohle se etsahetseng le se builoeng, lipakeng tsa seboka se seholo sa Kobotata ngoahola, le ha ho phatlalatsoa tumellano, e bolela hore le tšisinyo ea Korokoro ea ho hloka tšepo ho tonakholo, e tla nyamela joalo ka moholi, empa, erekaha Bra Tom e ntse e le tonakholo, ea ho lelekoa ha Holomo Molibeli bookameling ba sepolesa, eona, e ntse e tla tiea, ha nako ea eona e fihla. Ho tlaleha mohlomphehi mohlophisi e moholo.

 

Moetellipele oa Potoana o batla likhetho-pheto tsa ’Makhoroana ka mahlo a matšo

Democratic Congress Leader Mathibeli Mokhothu
Democratic Congress Leader, Mr. Mathibeli Mokhothu

MASERU — Monghali Mathibeli Mokhothu, o qhololitse komisi ea likhetho le ’muso oa Lesotho ho bitsa likhetho-pheto lebatooeng la ’Makhoroana, Mapoteng, DC etsoe e li haharela holimo.

Tsena o li buile thakholong ea letšolo la ho kena lebatooa ka leng ho ea tsoa komiting ea lona ea lekalana Lesotho ka moka, e neng e tšoaretsoe Ha ‘Makhoroana ka Labotšelela lena.

O bile a bolella Mapotoana le sechaba hore lekhotla la habo ha le ananele see a se bitsitseng liserekisi tsa tona-kholo le mokha oa eona tsa hore e na le morero oa ho itokolla botona-kholong, bakeng sa hore e hle a behe meja fatše, e e’o hlokomela litloholo tsa eona.

Monghali Mathibeli Mokhothu, o itse ha tonakoholo e ntse e bapala Movango ona, lekhotla la habo le sechaba sa Basotho, le tla emisa toropo ea Maseru khakhenene le mo e qobelle ho tsoa pusong e se e sa hetle ka morao. Ho tlaleha Mohlomphehi Mohlophisi e moholo

Monna oa Maqhaka, Berea, o re o ile a makalla ho utloa phala ea sepetlele sa Queen ’Mamohato Memorial, e mo hlalosetsa hore o tlo lula sepetlele moo bophelo bohle ba hae.

Serabele Nkhopeane o re o kene sepetlele ka Pulungoana ngoahola, e le ha a ne a e-na le bothata ba pelo,’me o re litaba tsena, o li boleletsoe ha a ne a batla hore sepetlele se mo lokolle, a e’o hloela bana kaha ba ne ba setse ba le bang,le ho ea batlana le mekoloto ea hae, kaha a se a se na molekane.

Phala ea sepetlele ka mohala, e itse mokuli ea joalo, o bile teng kokelong moo, empa ha moo ho itsoeng o tla lula bophelo bohle, ho teng o ne a hana ho ea moo a neng a lokela ho ea sebeletsoa, ka ha ’Mamohato Memorial e ne e se e qetile ka eena.

Mothepane Thahane, o re Serabele o ne a boetse a hana ho tsamaea le ha likoloi li ne li le teng tse rometsoeng ke sepetlele, a re o batla ho ea hae e seng moo sepetlele se neng se mo romella teng,’me o qeteletse a itsamaela feela a sa latela methati eo a neng a lokela ho e latela, ho latela bokulo ba hae.

Boemong bona, Phala ea Queen ’Mamohato e qetelletse e itse e keke ea bua letho kaha mokuli o se a se matsohong a eona, ka hona Lehakoe la litaba, le ikopanye le bookameli ba sepetlele seo a seng a le ho sona ha ha joale. Tlaleho ka ’Mamatebele Mokoenehi.

 

Mosali o fumanoa a rapaletse ka tlung a timetse, Motsekuoa

Moahi oa Motsekuoa,Vukazenzela,Maseru, o re molekane oa hae o bolauoe ke batho ba sa tsejoeng ka letsatsi la Labobeli la Khoeli ena.

Masilo Mosili o re o ne a le sieo, a le mosebetsing Rusternburg Afrika Boroa, a fumana mohala ka e mong moamani le eena, a mo tsebisa hore mosali oa hae o fumanoa a rapaletse katlung, a timetse, a le metopa ea ho khakhathoa, a bile a khumuhile ’meleng.

Masilo o re ho bonahala mohats’ae,’Mamosili Mosili, a ile a khakhathoa le ho bolaeloa sebakeng se seng, a isoa lapeng ke babolai ba hae e se e le mofu, kaha a ne a setse a le mong, hobane ngoana oa bona ea lilemo li tharo a ne a chaketse Mohalesuku, habo ’m’ae.

O re setopo se ile sa phuthoa ke mapolesa a Morija, a itseng ke hona a ntseng a etsa lipatlisiso ka lefu leo.Tlaleho ka ’Makearabetsoe Ncholo.

Alliance insurance e khakola letšolo la “Releutloile” Maseru.

Alliance Insurance e khakotse letšolo le lecha la Releutluile, ka la bohlano la beke ena ntlo-kholo ea eona Maseru.

Mookameli oa lithekiso Limakatso Mokobocho o re sena ba se etsa ele ho arabela sello sa baji ba Alliance, ba ileng ba etela hore ba batla ho tšelela ka lihlahisoeng tse ncha.

Mokobocho o re letšolo lena le butsoe ho fihlela ka ’Mesa monongoaha, kamor’a moo ba tla arabela sello se seng sa mabota a bona.Tlaleho ka Chalale Mokhethi

 

Tonakholo Thabane o re o na le morero oa ho beha meja fatše

Dr. Thomas Thabane

Tonakholo Dr. Motsoahae Thomas Thabane, o phatlallelitse bafuputsi ba litaba ka Labohlano lena, hore o na le morero oa ho beha meja fatše bo-tona-kholong, le hoja a sa hlalosa hore na neng, le se mo qosang ho etsa joalo.

Lekhoakhoa le re le tla tsoa le ntse le etelletse mokha oa Kobo-tata pele kamor’a boitokollo ba botonakholo, ho fihlella Matoala a entse qeto ea ho mo lokolla, kapa eena a itokolla.

O re o kopa tšoarelo ho Motlotlehi le Basotho ka liqabang tsa bona tsa phathi, tse qeteletseng li qhalanela ka pusong, e qetelletseng e e-ba bosula. Tlaleho ka Chalale Mokhethi.