Amerika e fumane mokhoa o mocha oa ho hlahloba tšoaetso ea corona

Linaha tsa lefatše ka ho fapakana, li ntse li sibolla mekhoa e mecha ea ho fofonela tšoaetso ea corona sechabeng. America e re e fumane hore tahlehelo ea tatso le phofonelo, ke a mang a matšoao a tšoaetso ea corona.

Ka lehlakoreng la khoebo le mesebetsi, President Donald Trump oa hona Amerika o qeta ho fetisa molao o tlang ho lumella likhoebo tse nyenyane ho bula nakong ena ea lockdown, o tlang ho etsa hore basebetsi ba se lahleheloe ke likoropo tsa bona, o be o thuse likhoebo tse tetebelitsoeng ke lockdown ea corona.

Jeremane eona e re koporasi ea eona e bitsoang Bosch e se e qapile mochini o thusang ho fofonela lefu leo, nakong ea lihora tse peli le halofo feela. Linaha ke hona li kopantseng banna le basali ba litsebi tsa phekolo ea mafu a batho, ka sepheo sa ho fumana moriana o ka phekolang bakuli ba corona.

Sebini sa rap sa Uganda e bile e le moparamente, sona se qapile pina e seng e fihletse batho ba likete li makholo a supileng ka nako le motsotso e hlokomelisang sechaba hore na lefu lena la seoa, le ka thibeloa joang. Ka pina eo, Bobi Wine o se a ntse a kosola, mothamo oa hae o feta tsebe.

Ho fihlela joale, Lesotho le ntse le hlalosoa le e-s’o be le pheko ea lefu la corona, ka lebaka leo, sechaba se lokela ho etsa sohle se matleng a sona ho thibela tšoaetso. Empa, li-thibela-corona tse fanoeng ke Matekane Group of Companies, e sa ntse ele pinyane ea ba boholong feela.

Ho joalo le ka meqeqekohali e fihlileng Lesotho ka sefofane sa Ethiopia, e le phallelo ea Basotho khahlanong le Corona, MOAFRIKA FM, e ntse e e-s’o tsebe hore na e feletse kae, e sa le lekunutu la ba e amohetseng, e leng ba lekala la bophelo

Mathibeli o makalla phatlalatso ea qomatsi ea corona

Democratic Congress Leader Mathibeli Mokhothu
Democratic Congress Leader, Mr. Mathibeli Mokhothu

Moetellipele oa bohanyetsi ba Lesotho o re o makalitsoe ke tsela ee tonakholo motsoahae thabane, a phatlalalitseng qomatsi ea corona ka teng.

Monghali Mathibeli Mokhothu, o re likateng tsa kasete ea qomatsi ena, li hlahlathela hole le melao ea naha ena e seng e ile ea tiisoa ke makhotla a boahloli.

Motaung o re ke tlolo e mpe ea molao hore e be tonakholo e entse kasete e reng qomatsi e simolotse ka la leshome le metso e robeli la khoeli ena, athe molao o re e lokela ho qala kamor’a phatlalatso ea eona kaseteng.

Ena e makalitseng Mokhothu, e itlhalosang e qala tšebetso ea eona ka la 18, e phatlalalitsoe ka la 27, e leng matsatsi a supileng kamora la 18 la khoeli e holimo.

Hape, Mokhothu o re kasete ena ha e re letho ka kabo ea toka, e khinne tšebetso ea makhotla. O re makhotla ke litsi tsa bohlokoa tse sa lokelang ho emisoa neng kapa neng

Rangoane Kaine o re ts’ebetso ea Bahlanka ha e sa tla loka

Khoejane Makhele - Rangoane Kaine
Rangoane oa Basotho, Khoejane Makhele.

E mong oa bamameli ba qhooa ena, a bua ho Hlahisa Maikutlo ea Labohlano lena, o itse naheng ena bahlanka ba thatafalloa ke ho phetha litaelo tsa ba boholong kapa tsa makhotla, ’me taba ena e bonahala e keke ea hlola e phekoleha.

Monghali Khoejane Makhele ea tsejoang ka la Rangoane Kaine, o ile a teka mohlala ka eena, a re esale tonakholo, e bile e le letona la Tšireletso, Dr. Motsoahae Thabane, a fana ka taelo ea hore a fuoe litsiane tsa hae ka 2012, empa le kajeno o ntse a e-so li fuoe.

O re o ne a ntse a latela methati e loketseng, ho fihlela ha a tlalehela letona la joale la Tšireletso, le ileng la mo kopanya le ba amehang, ba e-ba le lipuisano tse bonahetseng li tla ba le katleho, empa le tsona esale li emisa ho fihlela lena.

Litaba tsena tsa litsiane tsa Rangoane Kaine, li tiiselitsoe Lehakoe la Litaba ke letona Tefo Mapesela, ea itseng molli o ne a hlole masole ka litaba, a ba a ngolla sesole hore se mo fe se mo loketseng.

Ntlheng ea ho se phethahatsoe ha litaelo tsa makhotla teng, o re Lehakoe la Litaaba ha le ka raha sehlahla, ho tla kubuloha batho ba bangata ba tla re esale ba ahloleloa ke makhotla, ha ho letho le etsoang hore li phethahale.

’Mathabo Chobokoane

MGC e fana ka thepa e tla sebetsa khahlanong le Covid 19

mKAKU kABI
Minister of Health, Mr. Nkaku Kabi receiving sanitisers and face masks from Matekane Group of Companies, on behalf of his Ministry.

Matekane Group of Companies, e fane ka thepa e linyanyatsi le lisebelisuoa tse koahelang linko le molomo, bakeng sa ho loantša Covid 19, ho Lekala la Bophelo, tsa boleng ba likete tse makholo a mabeli le mashome a mahlano a Maloti, botenng ba letona la Bophelo, Nkaku Kabi le Dr. ’Nyane Letsie.

Litabeng tsena, letona le lisitseng moruo oa naha, Tlohelang Aumane, o khothalelitse likhoebo tse ling ho kenya letsoho joalo ka MGC, ho thibela tšoaetso ea Corona Virus ka ho reka thepa ea mofuta oo.

Thepa ena e rekiloeng khoebong ea Kobeli Business Solutions, ea Mosotho, e tla ajoa ke komiti e shebaneng le litaba tsa lefu lena la seoa, ka tšebelisano ’moho le Lekala la Bophelo. Mokholoane Ramainoane

Corona e khina tšebetso e tloalehileng ea makhotla ho pharalla le naha

Dr. Kananelo E. Mosito

Polelo ea Makhotla a Boahloli, ea Labohlano la beke ena, e chechisitse tulo ea lekhotla la Maipiletseo e neng e lokela ho ba ka ’Mesa ea monongoaha, ho fihlela nako e tlang ho phatlalatsoa ke lekhotla.

E re sena se latela hore Tonakholo Thabane, a phatlalatse ho lula hae ha Basotho, ho qala ka Sontaha, ho tla sebetsa moahlohli a le mong ea tla ba tšebetsong, ea tla mamela linyeoe tse potlakileng le likopo tsa libeili tse tlang ho ba ka ’Mantaha oa beke le beke ka hora ea leshome.

Court of Appeal Lesotho

Ha ho bosebeletsi bo lebelletsoeng makhotleng a mathomo naha ka bophara, ka mor’a phatlalatso ena. E qetella ka hore ’Maseterata e moholo a ka letsetsoa ho tla mamela likopo tsa libeili le liremante tsa babellaeloa ba qalang ho hlaha khotla. Tlaleho ka Relebohile Lengau

Baithuti ba thuto e phahameng ba tla tingoa lihlapiso nakong ea LOCKDOWN

Tlohelang Aumane

MASERU — Letona la Meralo, Dr. Tlohelang Aumane, le bua Nyakafateng ea Labohlano lena, le itse nakong ea LOCKDOWN, baithuti ba thuto e phahameng ba ke ke ba fumantšoa litsiane tsa bona ke lefapha la lihlapiso.

Le ha hole joalo, Aumane o tsoetsepele hore baithuti ba tla ’ne ba fumane chelete ea ho lefa matlo a bolulo, bakeng sa polokeho ea thepa ea bona. Hang hore selemo sa lithuto se khutlele setloaling, Manpower e tla boela e fa baithuti bohashana ba bona.

Baithuti ba kantle ho naha, ba tla ’ne ba fumane tlatsetso, haholo ba China le Cuba, kaha e le bona ba bonahalang ba a’ngoe ke seoa sena ho feta ba bang. Liofising tsa NMDS ho tla ’ne ho be le methoaela ea basebetsi ho thusa Basotho ba entseng likopo tsa ho ea ithuta kantle ho naha.

Litabeng tsa khoebo, Letona la Meralo le itse ke hona Lekala la habo lona, le ntseng le etsa boithuto na likhoebo tse tlang ho ameha nakong ena, ‘muso o tla li thusa joang. Tlaleho ka Mokholoane Ramainoane

Letsosa o re Thabane o koetetse molao oa motheo oa Lesotho.

Mokhethoa oa Qalabane, Monghali Motlalentoa Letsosa, o re tonakholo ea naha ena, Dr Motsoahae Thabane, o koetetse molao oa motheo, o phatlalalitse qomatsi a sa latela molao, ho ea ka temana ea mashome a mabeli a metso e meraro ea motheo oa naha ena.

O re temana eo, e re o tla phatlalatsa qomatsi kamor’a ho lumelloa ke Lekhotla la Naha, e leng le eletsang Motlotlehi, le hona a se a entse kasete e phatlalatsang qomatsi eo, e seng see a se entseng a re ke liqeto tsa lekhotla la matona.

Mokhethoa oa Malingoaneng, monghali Serialong Qoo, eena o itse o koetetse matla a paramente. Ka bobeli ba buile lenaneong la Puo ea Sesotho la MOAFRIKA ka Labone la beke ena, hoseng.

Lentsoe le neng le sebelisoa e le sehlooho sa Lenaneo, e ne e le koetela, e ileng ea hlalosoa e le ho nka kapa ho tlosa motho kapa ntho ka mahahapa, ka sheshe kapa ka likhoka. Ea e tlosang, tlhaloso e itse o e isa moo ho ratang eena, a sa lumellana le ea koeteloang kapa mong’a se koeteloang.

Bamameli ba itse lelapa la e mong, Seabo Sehlola, la Matebeng, Qachaseneke, le tlalehoang le hana ka morali e monyenyane oa lelapa la ’Marosisang Lehloka, ka le reng le mo nyetse ka chobeliso, le lemohe hore le ka ’na la fumanoa le le molato oa ho koetela ngoananyana eo ea lilemo li leshome le metso e mene, le ho mo fetola lekhoba la thobalano ha e ba le se le mo file koae.

Khosana e kholo ea Manyesemane e na le tšoaetso ea corona.

200325104319-02-prince-charles-0310-super-169

Khosana ea botlotlehi ba manyesemane, Prince Charles, e khethetsoe, ha e sa kopanela mosamo le oa eona oa litjepa, ka lebaka la tšoaetso ea Corona, empa o hlalosoa a se boemong bo bobe. O hlalosoa a se a bile a sebeletsa lapeng, e le hona ho mo khethela sa liramo tsa mali.

Lefu lena le hlalosoa le potlaka haholo ha le hlasela metsofe le litsohali tse kang eena. Khosana Charles o lilemo li mashome a supileng a motso o mong.

Spain, ke naha e ’ngoe ho tsa Juropo, e tlalehoang e se e phophoma lefu lena le simolotseng China, selemong se fetileng. Litlaleho li re Covid-19, e se e fetile ka bophelo ba batho ba makholo a supileng. Tonakholo ea Italia eona e se e phahamisitse matsoho, e tlositse tšepo ea eona ho lingaka le baoki, e e behile ho ’mopi oa leholimo le lefatše

Potoana e re ha e tšehetse ho fanyehoa ha Paramente.

Democratic Congress Leader Mathibeli Mokhothu

Phala ea Potoana e re lekhotla la habo eona, ha le tšehetse taba ea ho fanyehoa ha Paramente, ho entsoeng ke Tonakholo Motsoahae Thomas Thabane, Tonakholo ea naha ena.

Serialong Qoo
Serialong Qoo, Mokhethoa oa Malingoaneng.

Monghali Serialong Qoo, o re ha ho na lebaka le utloahang, le entseng hore ebe Tonakholo e entse seo, empa mosebetsi o sa ntse o le mongata ka Paramenteng, moo Maparamente a Lesotho a lokelang ho kopanya litheko ho thusa Sechaba sa Basotho se tsietsing ea ho hlaseloa ke Corona.

O tsoetsepele hore Paramente ke eona, nakong ena, eneng e lokela ho aba lichelete tse tla sebelisoa bakeng la seoa sena.

O re ke ’nete molao oa motheo, o lumella tonakholo hore e ka fanyeha Paramente ha ho e-na le tlokotsi, empa sena se entsoeng ke Tonakholo Thabane, ha sea nepahala, kaha ea nang le tokelo ea ho etsa joalo, e le Motlotlehi Rabasotho.

Tonakholo e re batho ba lule mahae ho qoba tšoaetso ea Covid-19.

ERN82ksX0AEJe1V

Tona-kholo ea Lesotho, Dr. Motsoahae Thomas Thabane, ka Laboraro lena, e fane ka puo ho beha sechaba sa Basotho leseling, ka liqeto tse fihletsoeng ke Lekhotla la Matona, tse reretsoeng ho sireletsa sechaba khahlanong le seoa sa kokoana-hloko ea Corona.

Dr. Thabane o re Lekhotla la Matona le entse qeto ea hore ho tloha ka la 29 khoeling ena, ho fihlela ka la 21 khoeling e tlang, ha ho motho ea tla lumelloa ho tsamaea bosiu. Batho bohle ba lule mahae, ba tsamaee ha feela ba lokela ho phetha mabaka a bohlokoa, joaloka ho ea litšebeletsong tsa bophelo le ho reka lijo le thepa ea bohlokoa ea ka tlung.

Hona ka nako eo, litšebeletso tse tla lumelloa ho tsoelapele ka tšebetso, ke litsi tsa Bophelo, Litšebeletso tsa tšireletso, Libanka, Mabenkele a thekiso ea lijo, le a thekiso ea meriana le litlhare. Litsi tsa phepelo ea metsi le tsa Mafura li tla ’ne li tsoelepele.

Lipitso le likopano tsohle tsa sechaba, meketjana ea boithabiso, lipapali le boithapollo, li emisoe hang-hang, ntle le litšebeletso tsa mafu, empa le ho tsona, ho lebelletsoe batho ba sa feteng mashome a mahlano ka palo.

Baphatlalatsi le litsi tsa khaso tse tla fumanoa li khelosa le ho tšosa sechaba ka litaba tseo e seng tsa ’nete, ka lefu la Covid-19, ba tla nkeloa likhato tsa molao kapa ho koaloe setsi se joalo.